香港人病好未？

喺黑暴時期發生大大小小嘅案件，都陸陸續續審完，好似近排嘅「醫院口岸爆炸案」，三名主犯被裁定「串謀導致爆炸」罪成，首被告何卓為被重判監禁18年，而其餘兩名被告李嘉濱及張家俊就各判入獄16年8個月。

法官判刑時指出，呢單係同類型案件中最嚴重嘅case。三個喪心病狂嘅被告，長時間犯案，先後牽涉明愛醫院同羅湖車站嘅爆炸，再計劃喺將軍澳尚德停車場放20公斤炸彈，不但針對警員，更罔顧公眾嘅人生安全，造成傷亡，犯罪行為可謂「食髓知味、變本加厲」，視「人命如草芥」，向社會宣戰。所以判刑必須要反映公眾對呢啲罪行嘅厭惡，同埋需要有阻嚇作用。而法官亦同時駁回兩名脫罪被告嘅訟費申請，清楚指出兩人喺Telegram有炸彈相關嘅訊息，又曾逗留喺製造同測試爆炸品嘅單位，明顯喺自招嫌疑嘅行為。

案中主腦何卓為，心理報告顯示佢亳無悔意同重犯機會高，所以並冇減刑嘅理由；其餘兩名核心成員，即使有悔意，都係流於表面。而據媒體報道，佢哋三個開庭前態度鬆容，不時向旁聽席微笑揮手，聞判嘅時候，更有人面露笑容，個個心情好似好輕鬆，對自己所做嘅一切毫無悔疚感，令零零發覺得不寒而慄！

呢單case同早前嘅「屠龍小隊」案，都係恐佈主義嘅行為，兩單案嘅起點，都因為黑暴之亂。兩幫人同樣製造了高性能炸藥嘅炸彈，「屠龍小隊」當時製造咗一大一小兩個炸彈，小嘅有兩公斤炸藥，而大嘅更加有8公斤炸藥，並且超前部署，一早送成員去台灣島接受軍事同槍械訓練，確保血腥「屠城」，萬無一失。而「醫院口岸爆炸案」嗰班人，更加租用單位，儲存以噸計爆炸品原材料去製造炸彈，包括被國際公認高性能炸藥TATP，好彩當時冇乜閃失，否則，成座大廈同週圍嘅人都會被炸到粉身碎骨！

呢兩班人對公眾同警方作出無差別襲擊，如果唔係警方及時制止，將會造成大量人命傷亡，雖然而家冇事，但總不能因為咁，就當冇嘢發生過！所以當有人喺社交媒體，幫佢哋「解說」嘅時候，我零零發真係好愕然！好似喺「missing files」臉書，竟然話「屠龍小隊」嘅炸彈只係籌備階段，存放喺學校山坡，都冇爆過，又冇死傷，何罪之有喎！到「醫院口岸爆炸案」嘅炸彈實實在在咁爆過，佢哋就講到被告係想借此向政府發出警號，希望政府喺嚴峻疫情下封關，阻截內地人流湧入香港咁話。佢哋不但扭曲犯罪事實，將所有罪行合理化，更將所有責任推得一乾二凈！

香港有好多人鍾意學西方嗰一套，咁不如睇吓國際社會點樣處理同類型案件先：2019年，超級大國一名23歲青年計劃炸白宮同自由神像，乜都未買就已經俾FBI拘捕，判監15年。2015年，一名女子只係上網查土製炸彈資料、喺零售店搵材料，未有行動就被捕還押，最終判囚15年。英角一個19歲青年網上散播極右翼仇恨影片，鼓吹「光榮殺人」同模仿行兇，雖然未落手，法官都形容佢為「高度危險」，判監11年半。香港而家咁樣拉、咁樣判呢兩單案，睇都符合國際慣例喎！

呢兩單咁暴力嘅案件，隨時死傷無數，但到今時今日，香港仲有一大班黃人、暴徒、本土或海外反中亂港嘅所謂學者、KOL等等，仍然死心不息，不停喺各種社交平台、媒體去宣揚歪理、麻痹香港市民嘅思維、宣荼毒年青人嘅思想，年中無休咁講到香港冇樣好，講到好似政府只有強權、警方就凈係識得用暴力、濫捕，佢哋又將犯刑事案嘅罪犯美化為所謂「政治犯」，總之就唯恐天下不亂，將歪理扭曲成「真理」，希望多啲人變「黃」或更加「黃」，甚至乎變黑(暴徒)！如果唔制止呢啲歪風，香港只會永無寧日！

講到呢度，絕對唔係零零發唸多咗㗎，「屠龍小隊」同「醫院口岸爆炸案」雖然分別都有5個被告甩難，但佢哋其實都被法官裁定表證成立，即係話有證據顯示佢哋有份參與計劃，只不過陪審團在將疑點利益歸於被告嘅大原則下，作出無罪嘅裁決。呢班人走番入社會，零零發當然希望佢哋會珍惜前途而改過啦，希望佢地唔係一個計時炸彈啦！最近「醫院口岸爆炸案」一個剛脫罪嘅被告，又再被警方以「暴動」罪拘捕，指佢涉嫌在黑暴期間制造武器俾前線暴徒，佢有冇罪，就要由法庭裁定喇！

總之，一場黑暴顛覆晒是非黑白，對與錯，所以大家就自求多福，希望屋企、office附近，無呢啲人喺度住、喺度返工；又或者希望大家睇到呢兩單炸彈案，都識得「醒」返，唔好再支持暴力違法行為啦！

鍾情局●零零發

鍾情局

** 博客文章文責自負,不代表本公司立場 **

早排見到有好多評論文章狠批新到任嘅美角駐港總領事「伊豬麗」，話佢8月尾接任駐港總領事冇耐，就接連兩次以同社會各界交流嘅名義，邀請反中亂港頭目，前高官「陳四萬」同前「白鴿黨」主席「劉大姐」出席歡迎酒會，假借「交流」之名，重啟同反華代理人嘅聯繫。事件惹起極大爭議，但我有啲唔熟政治嘅朋友就話，「伊豬麗」只係同佢地喺個酒會上見下面Mingle下啫，洗乜咁緊張？我零零發就認為，只要稍為了解下「伊豬麗」嘅背景同往績，就知道絕對唔係「Mingle下」咁簡單。

「伊豬麗」其實並唔係第一次喺香港工作，佢2019年就已經嚟咗香港，喺美領做政治部主管，仲建立咗豐厚嘅「禍港」往績。黑暴期間，傳媒揭發「伊豬麗」喺金鐘密會「港獨」組織「香港X志」成員「黃痴瘋」同「衣冠聰」，而「黃痴瘋」等人隨即就發動罷課同煽動學生上街；隔冇幾耐，「伊豬麗」又被揭發喺中環美國會所同有「禍港四人幫」之稱嘅「陳四萬」、「白頭李」等人開秘密會議，之後黑暴就愈演愈烈，汽油彈横飛嘅場面亦越嚟越多。

咁「伊豬麗」嚟香港搞事之前係做咩嘅呢? 翻查資料，原來佢精通中文、阿拉伯文同埋土耳其語，佢2002年喺美角喬治城大學畢業取得文學碩士、主修阿拉伯研究，同年經遴選後攞咗專門培養政治人才嘅美角總統管理獎學金，並因為咁而成功加入美角國務院心戰部門－「民主、人權及勞工事務局」工作。呢個局長期發布抹黑中國及香港人權嘅報告，相信「伊豬麗」亦都有撰寫過呢啲偏頗嘅報告。

「伊豬麗」其後喺美角外交系統工作超過20年，自2004年起，佢曾被派駐中東多國，包括沙特阿拉伯、黎巴嫩、以色列、卡塔爾、伊拉克等，期間不斷以「推動人權及民主」為名大搞政治滲透，被調侃為美角外交系統嘅心戰及顛覆專家，擅長用心戰手段達到政治目的。

「伊豬麗」有咁嘅背景同往績，今次一坐正做阿大，就請埋兩個反中亂港阿婆去歡迎酒會，你話佢冇政治目的，我諗都未必有人信喇!

睇番「伊豬麗」講一啲工作心得嘅文章，佢話外交工作係要將「聯繫」變成「朋友」、「朋友」變成「夥伴」，再一齊解決挑戰同實現共同目標。「伊豬麗」呢句說話，令零零發聯想到，佢係咪就係要將「陳四萬」同「劉大姐」由「聯繫」變「朋友」，再變「夥伴」，再一齊實現佢地嘅反中亂港共同目標? 其實點解「陳四萬」同「劉大姐」會獲得「伊豬麗」嘅青睞呢?

「陳四萬」喺回歸前係獲英角佬重用嘅政府高官，不過回歸後做咗一陣就退休，之後佢就不斷同犯民圍爐，並成為「國際線」嘅打手。2014年政改爭議時，佢飛去美角同時任副總統「登登」會面，游說美角干預香港事務，冇耐就爆發「佔中」。 2019年修例爭議時，佢先去美角向時任副總統「彭撕」等人「告洋狀」，又去德角游說官員同政客支持香港抗爭。而黑暴期間，佢唔單止公開鼓勵公務員上街遊行，仲四出幫「生果佬」泵水嘅「重光團隊」，穿針引線去見英角駐港總領事。「陳四萬」咁鐘意服侍外國主子，唔怪之「伊豬麗」一上場就要見佢喇。

2019年黑暴猖擴之時,「港獨」組織「香港X志」成員喺金鐘的「重要」會面。

至於「劉大姐」就係2019年修例爭議時，與一眾犯民黨羽去見當時嘅美角駐港總領事，抹黑修例。黑暴爆發後，佢更加多次出訪美角、英角、楓葉角等西方國家，呼籲當地議員、政客去干預香港事務。到2020年《國安法》訂立之前，佢除咗忙住抹黑《國安法》，仲寫信比英角內政部，促請俾持有BNO護照嘅香港人有居英權。時至今日，佢仍然賊心不死，搞咗個網台節目「ChatDP」，借訪問「黃人」去製造反政府聲音，似乎佢仲好想延續佢嘅「政治生涯」……高人話「劉大姐」再次俾美角主子寵幸好開心，喺酒會滿場飛，仲懶得戚喺面書上載被主子加持嘅相。

今次「伊豬麗」請「陳四萬」及「劉大姐」去酒會聚舊，揭示咗美角想老調重彈，重建在港代理人網絡，甚至乎係想「陳四萬」同「劉大姐」以老帶新，等美角可以吸納新一代做代理人，再一次搞亂香港。而事件亦都反映咗有啲反中亂港分子仍然死心不息，一有機會就仆埋去主子度，以顯示忠誠!

「劉大姐」上載2025年美領 酒會的照片。

所以大家要認住呢隻「豬」，因為佢係真真正正「扮豬食老虎」嗰隻嚟㗎！

鍾情局,零零發