港鐵突然「自爆」高鐵工程至少延誤九個月，外界預計會嚴重超支，分分鐘鐘過百億。
但港鐵總經理鄧維勇早上在一個電台節目就唔係咁講，被問到係咪將來會申請更多錢時話，依家暫時可以應付，主持人追問：整個工程，669億都可以應付？鄧總經理幾肯定咁話：「669億，是的，暫時可以應付。」
點解都水浸眼眉，港鐵仲咁講呢，據了解地鐵工程的人士話，高鐵超支條數，可能未必如想像中咁大，港鐵批出好多工程，但主要承建商都係那幾個，舉個例一個承建商接咗港鐵十份工程合約，當中六份因為港鐵修改工程設計而延誤，承建商會追港鐵，但另有四份合約因為承建商請唔到工人而延誤，港鐵就會追番承建商，一加一減條數就未必一定會好大。
外界同港鐵對超支睇法出現羅生門，港鐵認為有啲延誤可以追番承建商，而外界從一般工程延誤來觀測，超支幾乎係必然的情況。其實按照正常情況，工程愈往後推遲，各項成本支出都只會加不會減，高鐵最終超支的風險都唔細，加埋今日咁講，第日如果超支，要去到立法會追加撥款，建制派都會反枱，相信運房局啲官諗起都頭痛。
Ariel
** 博客文章文責自負,不代表本公司立場 **
高鐵如今宣布延誤至少９個月，Ariel有少少擔心佢延遲一年都未掂，恐怕港鐵亦一早知道出咗問題，過去唔肯認，等到上月連場大雨加落雹後，咁就借黑雨過橋，搵啱時候先至認延期。
延期最大問題係超支，政府當日撥咗669億元起高鐵，當中鐵路工程佔550億，非鐵路工程佔118億，如今就係呢550億鐵路工程出咗問題，唔使問會唔會超支， 係一定會超支。而家人工咁貴，做多一日貴一日啦。由於港鐵將工程判咗出街，舊年承建商已放晒料出街，又話港鐵設計有問題，又話港鐵多嘢改搞到遲晒，呢啲都係承建商打定底想索償的前奏。
記者問張炳良局長高鐵會唔會超支，超支邊個俾，局長答唔到，話等緊詳細報告，未有具體嘢可以講。
高鐵超支呢條數唔易孭，最可能孭數的是政府或港鐵，當日政府攞到撥款後判咗俾港鐵做鐵路工程，超支邊個俾第一睇合約，第二睇現實上邊個俾得到，因為無論合約點寫，都要現實上攞到錢去找數先至得。
理論上政府最有錢，最易俾。但照目前走勢，高鐵項目超40、50億閒閒地，超過百億都唔奇，當日立法會批港鐵撥款時己搞到差不多過唔到，如今再去立法會攞過百億，咪等如送死? 建制派都唔肯硬撐。 現實上無理由俾工程爛尾，但趣趣地要搵番一兩個人頭落地，先過到立法會呢關。雖然成件事由上任運輸局局長鄭汝樺開始，但燒起上來，現任張局長又有無監管不力之責呢?
諗起去立法會咁頭痛，不如叫港鐵啃咗佢算啦，但港鐵又唔易啃得落，港鐵去年盈利130億，去年底時資產淨值1526億，假設要賠100億，差不多唔見咗成年盈利，唔見6%資產淨值。嘩，港鐵若然會輸咁多錢，首先要發盈警，然後主要管理層難免要下台向股東交待喎，咁賠法可行性一樣咁低。而且政府佔港鐵75%股權，叫港鐵賠納稅人仍然要輸75%，港鐵小股東陪輸25%，勝在不用過立法會，但納稅人要找數的本質仍然無變。
結論高鐵延期加超支，係一個大炸彈喎。
