政事
林鄭月娥昨日公布新一屆行政會議班子，六名行會「新丁」中較惹人注目的有任志剛、湯家驊和專注安老服務的林正財醫生。林鄭雖然銳意吸納中性甚至如湯家鏵那類接近泛民的人物，湯家驊亦表明想做政府與泛民之間的橋樑，但未獲泛民好評，民主黨主席胡志偉認為，湯家驊加入行會，不代表林太施政時會吸納民主派的意見。
不過更惹人注目的是公民黨黨魁楊岳橋的評論，岳少質疑湯家驊不能代表民主派，因為湯2015年退出公民黨時，曾揚言要創立「第三條路」，說法明顯和泛民一貫的思維不同，質疑若林太希望與泛民溝通，根本毋須其他橋樑。
政壇八卦友話，其他泛民講呢啲好正常，但岳少講就有少少出位啦。想當年岳少跟湯家驊在新界東參選，可以話由湯狀帶佢出身，後來湯狀在2015年退出公民黨兼辭去新界東議員職位，才出現2016年頭的補選，岳少因而入局，湯狀當時仍然話楊岳橋係接佢個位的合適人選，簡直係視岳少為「接班人」。
八卦友話，呢個世界教識徒弟無師傅，如今湯狀入行會，岳少照樣插，呢個故事教訓政壇的老人家，世界變咗啦，用番以前的角度睇如今的時局，你喊三晚都未喊完。
Ariel
** 博客文章文責自負,不代表本公司立場 **
林鄭新班子亮相，唯一一個外人入局係前民主黨大腦羅致光，佢出任勞工福利局局長。
有建制派中人條氣有少少唔順，話教聯會的蔡若蓮可能出任教育局副局長，就俾教協插到暈，但民主黨的羅致光做勞福局局長，工聯會係唔係可以大力反對先?
佢咁講當然係諷剌泛民佢地自己友入政府就得，對家入政府就大鬧。不過呢個說法亦反映咗一個現象，就係羅致光入政府，唔等如建制派無情緒喎。
有件事睇到羅致光好聰明，之前政府有一份副局長人選名單，俾各個候任局長去揀，來自民建聯的民政事務局政治助理徐英偉，都可以在升做副局的名單之上。羅致光一句唔該，就揀徐英偉做勞福局副局長。
民建聯的人物，自然俾反對派的媒體踩到似廢物，點解聰明如羅致光會搶往去揀? 佢一則固然是睇中徐英偉的潛質，二則是看上徐英偉的民建聯背景。勞福局推動的法案若想在立法會通過，如果得唔到民建聯這個大黨支持，都幾難過到關。問題是若民建聯唔想見一個來自民主黨的局長，可以點算? 最簡單的方法，就係搵個民建聯的副局長，由佢先去搭路，民建聯都會俾吓面啩。
政壇高人話，新政府可能更加需要和建制派抱緊，特別注意「更加」這兩個字，是和現屆CY政府比較，CY本來有建制支持，唔需要特別下功夫，但林鄭來自公務員體系，若然得唔到建制派支持，在立法會寸步難行。羅致光睇得通呢個局，所以就在揀副局就早著先鞭了。
