金牙大狀: 話鄭若驊犯《盜竊條例》又太離題

律政司司長鄭若驊的「僭建門」繼續被玩，反對派開始指她犯法，話佢向渣打銀行簽訂的按揭文件，並無提及屋內有僭建地庫，簽字保證物業詳情屬真實完整，觸犯《盜竊條例》中「以欺騙手段取得金錢利益」罪。

佢地又引述前離島區議員林悅於2012年購入將軍澳天晉兩個單位，向恒生銀行申請按揭時，提交了假的入息證明，騙取共669萬元按揭貸款，結果被判監禁21個月、緩刑2年，喪失議員資格。

公民黨議員陳淑莊昨在立法會答問大會上追問特首林鄭，問鄭若驊「係咪犯咗法？」而工黨成員就到灣仔警察總部報案，質疑鄭若驊涉嫌作出虛假聲明，以欺騙銀行按揭貸款，叫警方徹底調查。

金牙大狀話，鄭若驊是否對僭建知情可以拗，但話佢犯咗《盜竊條例》又離咗題，誇咗少少，引用的區議員林悅個案亦不可比。林悅係有意提供假入息證明，好易證明到佢有意騙銀行。鄭若驊並無提供假文件，你話佢對僭建知情，要證明她知情喎。

金牙大狀話，刑事案要「不留合理疑點」(beyond reasonable doubt)地證明被告有罪，睇嚟無乜辦法證明鄭若驊對僭建知情，現在有的只是推論，話佢有心騙銀行，要夾硬告佢，只有推論並無證據，就會有好多合理疑點。

但佢話反對派議員借報案已形成一個公眾印象，以後不斷問律政司告唔告自己，已經達到目的了。

Ariel

** 博客文章文責自負,不代表本公司立場 **

行政會議成員李國章接受劉慧卿網台節目「議會內外」訪問，亞瑟王李國章除了引述他質問港大校長馬斐森的whatsapp對答，反擊所謂中聯辦干預港大的說法之外，亦有提到律政司司長鄭若驊的僭建事件。

李國章(資料圖片)

卿姐問李國章，「你都做過問責官員、行會成員，上任前的品格審查有無問吓你，有無僭建?」卿姐話如果鄭若驊答自己無僭建，真是抓破頭也不知她為何如此。

鄭若驊(資料圖片)

李國章話相信品格審查時應該有問有無僭建，佢估鄭若驊答「無僭建」，可能佢真係唔知道自己間屋有僭建。

李國章忽然提到馬時亨的例仔，話大家都睇過馬時亨當年上任不久，發生仙股事件，馬上被人鬧得好緊要，但之後大家都見到，幾年之後馬時亨的工作表現非常好，而家都做得非常好。

馬時亨(資料圖片)

卿姐就話，「咁你即係叫鄭若驊學馬時亨，馬時亨我知道你睇緊，咁你就要過幾招比鄭若驊。即係叫佢要跌咗落地底，慢慢爬返上嚟。」李國章話，最緊係要睇下鄭若驊法律方面的表現，睇佢係唔係維護香港的法治，這樣非常重要。

亞瑟王真是高手，抬出馬時亨這個敗部復活的成功個案，去撐鄭若驊，相信馬時亨見到人地提及他的傷心往事，也不會太反對，因為亞瑟王贊佢而家做得好好嘛。