小鯊雖然唔係財經評論家，但係睇傳媒的確有一套。早前毛記葵涌（1716）上市之前，喪炒間接持有毛記10%股份的世界華文媒體(0685)，世華是《明報》的大股東，在3月19日曾經大升2.3倍，單日由0.72元升到2.4元。
小鯊一直懷疑這是一個局，喪炒世華只為造起毛記上市氣氛，當日已經提醒大家，亂炒世華「無乜理性可言」，叫大家無謂去掂佢。
圖: 小鯊在3月19日已提醒大家，世華咁升法無乜理性可言。
結果毛記上市後，由首日高見11.76元，之後反覆大插，到今日中午跌到只有2.44元，首日高追者喊得一句句，唔見咗79%，唯有求神拜佛，望上番高位可以有得走。而當日喪升的世華亦同樣急插，如今得番0.86元，當日高追者唔見了64%。小鯊當日示警幫到大家，唔去炒就輸少好多。
我聽傳媒中人講，如今報業經營環境不佳，近日油價上升，加上大陸限制廢紙原料進口，搞到大陸由以前出口白報紙，變成要入口白報紙，搞到白報紙價急升，由去年今日485美元一噸，急升到如今近700美元，令報業成本大漲，經營環境差過去年，所以世華股價未打回原型0.72元，已經算萬幸。除非世華把手持的毛記股份沽出街，否則毛記上市，只是帳面數，實質益唔到世華喎。
小鯊
** 博客文章文責自負,不代表本公司立場 **
