千祈唔好以為上市公司通告好悶 呢份你一定要睇……

天氣炎熱氣氛沉悶，可以睇吓上市公司通告解悶，你唔係睇錯，真係叫你睇上市公司通告。
上市公司 China Properties(1838)發表中期業績報告，間公司生意唔太活躍，今年上半年只做了2878萬人民幣生意，靠物業重估收益4.2億，上半年賺2.8億，但睇這些就錯重點了，真正好睇的是「業務回顧及展望」那部份，非常出位，唔知仲以為是毛記葵涌(1716)的出品。

China Properties(1838)發表中期業績報告

China Properties中期報告的「業務回顧及展望」

由於內容太正，真係刪一句都賺多，China Properties的「業務回顧及展望」全文如下:
「10年前美國狂印鈔票輸出全世界。現在美國與全世界為敵，要將輸出的美金（於今年第一季度新興市場的美金債已逼近3.7萬億）和遷出美國的供應鏈搬師回朝，整冧別國的資產市場和全球供應鏈佈局。所以美國的敵人特別多，幸好川普沒有毛澤東的智慧，拉一個打一個，佢係打晒全世界。但要消滅美國這個霸主不容易，歷史上要踢走大佬，都是要冒上先被大佬打死的風險，但中國足智多謀，鄧小平說：要摸著石頭過河，江澤民說：要悶聲發大財，韓信更忍跨下之辱。但造就了一個又一個「奇世」。今天美國把貿易戰打得翻天，不過以川普的智慧，要整冧中國的模式，也不是係借火這麼容易。只是大戰在即，有危就有機。所以本集團的既定方針不變，雖然部分項目正等待政府的新規劃而延誤，但令股東盈利始終是本集團的目標。」

一間上市公司可以公然咁講:「要消滅美國這個霸主不容易，歷史上要踢走大佬，都是要冒上先被大佬打死的風險」，真係好睇過網台節目。

汪世忠

ChinaProperty由汪世忠持有，在2007年上市，主要在內地做房地產，當日上市時好幾日在報上登全版廣告，放了主席汪世忠張相，相當出位。估唔到而家出中期業績報告，都有好嘢。唔知出呢啲業績報告，港交所事前有無過目呢?

小鯊

** 博客文章文責自負,不代表本公司立場 **

天口熱，人好燥，又有蚊患播毒，氣氛沉悶。但今早睇星島，見專欄作者盧駿有篇文好趣，題為「小心政壇毒蚊 傳播腦炎」，睇完笑咗出聲。內文講到有政壇毒蚊到處飛，傳播怪論，不斷為炮轟港獨事件降溫，話這些事情只是建制派搞出來。但最後政治局常委韓正出嚟講嘢，話對港獨零容忍，呢班人就露晒底。

星島文章發炮

呢篇文引起政壇熱議，急問文中兩大主角：中了毒的「余腦炎」及放毒的「傻仔毒蚊」是誰。小鯊向知情高人求證，發現「余腦炎」是指某老牌財經報專欄作家，而「傻仔毒蚊」是誰，高人話：「 你懂的，邊個經常向這些報紙專欄放料呀？」

星島有關文章全文如下：

「港澳工作小組組長韓正見紀律部隊代表團，主動向港獨開火，話對港獨『零容忍』，令到好多仍在夢中的政壇塘邊鶴，即刻紮醒。」

「一個星期前，中港已開始炮聲隆隆，猛轟港獨及其同情者，有個『余腦炎』就跳出來亂解話，話炮火只係代表建制派搞局，唔代表中央，結果唔夠一個星期就露哂底，方向全錯。」

「余腦炎無料扮代表，猛話政府冷處理陳浩天播毒有理， 睇嚟佢係俾傻仔毒蚊針咗，感染腦炎病毒，所以先至上晒腦，北京已經炮聲隆隆開始轟港獨，佢都聽唔見，睇唔到。」

「呢的政壇『三帶喙庫蚊』，仲四圍亂飛，到處播毒。好多人聽完毒蚊的怪論，心中半信半疑。到周一聽完政治局常委韓正主動出撃，心諗難道傻仔毒蚊夠膽話韓正唔代表中央？」

「至此真相大白，大家先知傻仔毒蚊係老點。以後要認住呢隻蚊，唔好俾佢咬中，否則染上政壇腦炎，連路都睇唔到呀。」