「山竹」遠離本港市民今日要如常上班,但新界市民上班逼爆東鐵,罵聲處處。政黨亦罕有咁「齊心」,一齊鬧政府。
民主黨立法會黨團發表聲明,譴責政府無認真評估市面情況,拒絕廣大市民要求停工的建議。民主黨聲明又說,主席胡志偉昨晚曾經聯絡特首辦,要求政府因應颱風情況宣佈政府非緊急人員停工,以起帶頭示範作用,讓私人機構跟隨,以便善後工作,但不被理會,令今早上班的市民及無法上班的市民怨聲載道。
而民建聯亦發炮,民建聯議員陳克勤在facebook話,「政府今次堅離地,無車叫人點返工?山竹吹襲後翌日,全城交通癱瘓,但又沒有了風假,結果今朝一早玩殘了全港打工仔。其實政府帶頭作表率,非緊急部門既公務員停工一天,並鼓勵私人公司效法,以減輕公共運輸壓力。」
陳克勤又話,「如有必要,應研究特事特辦,於大型天災後可視乎情況後宣佈全港放假。但是政府只是墨守成規,總之落波就要返工,無情講。發覺唔掂先出來講兩句叫老闆唔好叫人返工,有鬼用咩,一早出晒門口啦!」
陳克勤最後三句意有所指,因為今早新界交通出事後,特首林鄭月娥早上出來講,「政府各個部門在處理有上班困難的員工時,只要通知上司因路況問題而無法上班,便不會當缺勤,也毋須特地請假。林鄭月娥呼籲本港其他僱主也效法政府的做法,靈活安排僱員上班情況。」
陳克勤是新界東直選議員,政府風災善後安排差,燒正他的地區,所以都忍唔住出來講話,暗砌特首了。
Ariel
** 博客文章文責自負,不代表本公司立場 **