反彈

自由黨田北俊公開呼籲特首梁振英考慮辭職後被全國政協「搣柴」，外界都好關心田少以至少部份成日窒特首的政協，有何反應。

田少決定辭去自由黨黨魁一職，話日後可更加「暢所欲言」，但其後見記者時，評論都唔算激，至多玩吓「句句有骨」，例如記者問佢2017年會否選特首﹖佢就話「行政長官呢份工認真唔係好做，持份者包括體育界、宗教界、收入$14,000樓下，富豪呀，北京呀，都係你嘅老闆，我可能做慣老闆，叫我做夥計服侍咁多老闆呢，我冇咁嘅能力，亦都冇咁嘅興趣囉。」

田少講的領域大部係特首CY近期講錯說話的地方，可見田大少度氣都相當頂住。不過以他的脾性，一係唔講，咁講已算溫和，可能是顧慮黨友的處境，自己唔玩，都唔想累到仲要同阿爺玩的黨友。

其餘平日比較出位批特首的政協，如立法會曾主席、立法會議員林大輝和工聯會嫻姐，部份都有現身。例如曾鈺成昨日早上在有線電視訪問時和特首大唱反調，稱個人看不到有外部勢力介入這場運動，「我睇唔到有事實呀。可能特首佢睇到，我睇唔到嘛；佢睇到好多嘢，我睇唔到㗎」。不過就唔知個訪問在田少摵柴事件發生前定發生後做。假設設問在摵柴事件發生後做，都可以話曾主席只係講不同意見，唔係倒梁。

林大輝就激少少，昨日在立法會大會討論成立創新及科技局時，直接話CY說話充滿語言偽術「好叻」，批評其「14K論」及「體育界宗教界對經濟無貢獻論」令人摸不著頭惱，慨嘆「講唔啱聽嘅說話要付出代價」，又話「苦口良藥利於病，忠言逆耳利於行」呢啲說法在香港政界行不通。句句都似乎在間接評論搣柴事件。立法會曾主席即時問大輝哥：「你係咪政協委員？」呢個問題唔知算唔算提醒，但大輝哥對曾主席的問題無回應。之前有傳田少搵過大輝哥入去自由黨接自己黨魁個位嚟做，兩人應該有計傾，大輝哥似乎都幾唔順田少被搣柴。另外暫時未見嫻姐發聲。

由田少到大輝，他們的言語都是對搣柴事件的反彈，反彈過後，冷靜過來，建制派應會重新評估北京領導的新作風，以及自己在這種施政新風下，應該如何自處了。

Ariel

** 博客文章文責自負,不代表本公司立場 **

香港有人佔中，亦有人反佔中，你走軟的路線有市場，行硬亦有市場，好像行政會議成員葉劉，一直在撐警，亦有她的擁躉。

她早前出席警隊員佐級協會的晚宴，上台發表講話，說「我支持你地(警察)，其實係支持香港，靠你地支持香港。董生話解放軍有力平亂，但我們不想用解放軍，一用，香港就完蛋。好多人想看到一幅相，看到流血鏡頭，來攻擊香港，我地唔會讓呢啲力量得逞。」

佢又話「只要有精力一日，支持各位，為各位發聲。推動社會發聲，支持專業無私的警隊。感激各位支持我。」現場掌聲甚多，葉劉警察粉絲多。

葉劉挺警，亦無倒梁，跟中央立場跟得好貼。政壇八卦友話，想特首CY中途落台就唔使諗啦，但2017年下屆又有得選，目前咁局面，2017年特首選舉，好易原地踏步，葉劉真係一條心跑下屆，行強硬路線，亦有佢的市場，她成為CY以外另一個「硬的選擇」。

講開又講，葉劉講嘢有骨，當晚佢走之前話，「我『唔打得』，都係寫文章同講嘢。未來日子和各位風雨同路。」臨走都好似想窒吓佢個AO師妹林鄭，林鄭有好打得的外號，葉劉話自己唔打得，意有所指喎。