公司勁蝕老細郭台銘去選總統 到底富智康在炒什麼？

今日中環熱話，已經不再是許志安王心穎的車震醜聞，改為吹鴻海集團董事長郭台銘昨日﹙4月17日﹚宣布角逐台灣的總統大選。同「安心事件」刺激壹傳媒（ 0282 ）昨日爆炒一樣，郭台銘選總統的消息，亦刺激鴻海系上市公司狂炒了兩天。

中環人好黑心，大家都睇住呢啲政治或者八卦新聞幾時炒完，而追入的散戶如何陪葬。

郭台銘話媽祖叫他參選。東森影片截圖。

壹傳媒一如所料，今日上午再跌超過4%，股價去番0.195元，即係話因為「安心事件」的炒作後完全打回原型，股價無升過，所有在炒上時追入的散戶全部扮蟹。

富智康一日圖。

富智康就玩咗兩日，繼昨日大升28.2%後，今早再度炒上，一度急抽58%至2.23元，尚風當時的感覺，左睇右睇都唔覺得郭台銘選總統，可以益到間公司升得咁癲。今時今日，做政客不可以私相授受益公司喎。

富智康今早一開就再喪炒上高位2.23元，10點過後一直急回，中午之後，只得返1.5元，升幅只有6%，高位入咗貨，半日已唔見咗33%！想止蝕都未必走得切，呢啲就係炒政治概念恐怖之處。

其實富智康生意唔掂，佢仲未公布去年全年業績，但去年佢曾發發盈警，話2018年截至9月底止9個月，將錄綜合淨虧損約為5.75億（美元，下同），已超過對上一年全年虧損5.25億元的金額，故預期至今年12月底止全年，按年錄得的虧損將會大幅擴大。

集團基本因素咁差，老細仲要分心去選總統，中環茶友竊竊私語，話究竟呢個係咪好消息呢？

尚風

** 博客文章文責自負,不代表本公司立場 **

黃心穎許志安偷食事件發酵，迅速成為全城關注新聞，連中環人都吹水不完，主因兩個都是娛樂圈名人，但卻同樣犯了大忌，一個擒人夫，一個勾二嫂，而最特別是各自的另一半，Sammi 及馬明向來形象健康，有大量fans愛戴，今次偶像被另一半背叛，不感同身受，怒火中燒才怪，於是紛紛聲討。

心穎BB馬上被無綫雪藏，劇集、主題曲被抽起，連家姐心美、個様似佢的蔡一智也被指責，可見fans的憤怒！而許志安雖然馬上開記招道歉，但看來幫助不大，背負賤男之名，未來的演唱會，相信凍過水！

許志安開記招幫助不大。

市傳蘋果日報畀咗幾十萬買片，佢地個網近日搞緊登記咗先有得睇嘅活動，據聞呢單新聞令佢地多咗幾十萬人登記，有人見機不可失，今日便借勢用呢個藉口炒壹傳媒（0282），今早一開市股價就抽高至0.239元，大升22.6%，之後反覆回落，收市報0.204元，只升4.6%，上午入市，下午已輸到喊。一日唔見18%，跟熱門新聞炒股，可以死得好快。

壹傳媒一天股價圖。

 查此股股價由07年4.5元一路跌，之後做五合一。過去幾年每年均要蝕數億元，近月紛紛賣出台灣資產救亡，收費訂閲前途未卜，要扭虧為盈，仍需努力。想靠一條獨家新聞扭轉大局，並不是那麼容易。