位於香港中環金融街8號的四季酒店，聳立在國金一期及二期旁，多年來披著頗為神秘的面紗。你很少看見它的宣傳，或許因為根本生意無憂，高樓內充斥著大陸來港的政商重量級人脈，沉默隠居，向北而望，因而得「望北樓」 之名。
IFC猛人話，如果你想見識一下，到四季high tea 或鋸扒，你不用打電話訂位留座，因為永遠是常滿，你最好親自walk-in, 期望知客接待員網開一面，讓你入內光顧，把其中一張吉枱的Reserved膠牌取走，勉強讓你短敍消費，因為眾多吉枱都是預留給不知名的貴客，懶理他們是否真的會來。
聳立中環海旁的四季酒店，被中環人命名為「望北樓」
流傳中環坊間的閒言指，謝霆鋒和陳冠希曾在四季酒店大打出手，亦有人見過眾多來自大陸的重磅人士落腳，包括有內地「神秘資本大鱷」之稱的「明天系」掌門人肖建華、佳兆業的郭英成、山西聯盛集團邢利斌、被證監禁止10年不准入市的北大青鳥董事長許振東、北大青鳥集團執行總裁蘇達仁，以及樂視創辦人賈躍亭。
究竟甚麼因素令四季酒店地位如此超然，除了它是超豪的六星級酒店之外，原來一切也是與location 位置有關。住客可步行往附近國金二期找投資銀行家、律師及會計師，將財富洗淨、轉移或收藏。走去附近各國的領事館也是相當方便，車程五分鐘內可到，要申請移民、尋求庇護，甚至轉換身份，也是方便。
真是搞不掂要著草，在酒店樓下，有行人天橋駁接往國金一期，可先在地面check in, 然後乘搭機場快線鐵路直達機場。要走水路的話，步行10分鐘往上環信德中心，便可乘搭噴射船或直升機過大海。難怪四季酒店成為眾多國內富豪的臨時避難所。
不過，「望北樓」將很快成為往事，中環人已將之改名為「北無望」，因為大部份望北常客，已經無望北上返鄉。
尚風
** 博客文章文責自負,不代表本公司立場 **
中環金融人，今朝(5月9日)個個黑眼圈，因為已經連續兩晚深夜三點睇歐聯四強大戰。個股市跌成咁，今日又跌近700點，真係睇波好過睇市！
歐聯四強大戰，落後球隊頻頻反底，周二晚首先見到利物浦，首回合落後巴塞隆拿三球，返到主場，在主將沙拿及費明奴缺陣下，竟然可以由兩個後備前鋒奧列治及韋拿杜姆每人射入兩球，贏四比零晉級。
輪到昨晚，熱刺首回合主場輸零比一後，次回合作客荷蘭阿積士，上半場落後二比零，下半場竟然可以俾平時做開後備的盧卡斯連入三球，在補時階段完場前30秒入咗第三球，追成平手，以較佳作客入球絕殺晉級，罕見地出現歐聯決賽由兩支英超球隊爭冠軍的紀錄。
盧卡斯昨晚為熱刺反底，創造另一奇蹟。AP圖片
究竟發生什麼事？尚風唔係足球專家，不過踢波同埋睇波都幾十年，有以下心得，可以一吹。
尋晚呢場四強大戰，當荷蘭阿積士年青球員們上半場無壓力時，做出悦目小組進攻足球，攻勢排山倒海，熱刺根本控球不多，常常中場斷纜，結果好快被阿積士攻入兩球。但阿積士領先之後，出現奇怪現象，球員變得保守，好似好怕輸波，不再用小組攻擊，反而大腳長傳解圍算數，希望就此瓦解熱刺攻勢，保持領先直到完場。
但踢波嘅嘢，此消彼長，你唔攻我就輪到我攻你，下半場熱刺就係咁樣，係禁區內好快把握機會入咗兩球。阿積士教練火上加油，調入更多防守球員，以圖頂着熱刺攻勢，令阿積士的小組攻勢更加少。佢哋又唔好彩，在少有的反擊中，有兩個必入波射唔入，一球在十碼點射門僅僅出界，一球中柱，否則如果入多一球，就可以一早將熱刺判死刑。
由於阿積士球員身材平均唔夠熱刺高大，被熱刺攞返主動，頻頻斬波入禁區博亂，結果補時階段，熱刺在完場前30秒入第三球，阿積士乜仇都無得報。
球隊領先，點解唔繼續打返自己風格？點解要龜縮？一龜縮就俾人㩒返轉頭來攻，就會出現這種戰果。我覺得呢個現象，發源於摩連奴在車路士的時代，一領先，就擺大巴喺後防，希望守和算數。
睇返利物浦贏巴塞四比零果場，因為利物浦一定要贏四球先至可以晉級，所以入了兩三球之後，依然繼續積極搶攻，最後終於達標，如果佢哋的目標只係入兩球，咁隨時入咗兩球之後，跟住就龜縮嘅話，最後畀巴塞入番波嘅機會就好大。
球員心理學、足球戰術，都係好高深嘅學問，絕對可以作為一個學術專業研究，然後寫一篇博士論文。
