美國總統特朗普指，墨西哥容許大量非法移民湧向美國，對美國國家安全及經濟構成緊急及特別巨大的威脅，美國將於6月10日起向墨西哥所有貨品開徵5%關稅，若問題未解決，7月起關稅稅率將上調至10%，逐月上調5個百分點，直至10月上調至25%。
受美國有關宣布影響，杜指期貨在亞洲今日早市急跌，一度跌250點，報25010點 ，今晚美股將會裂口低開。
另外內地今日公布5月製造業PMI重回收縮區間，由4月的50.1跌至49.4，低於市場預期的49.9， 經濟放緩風險上升，港股可謂四面受敵。恆指今早低開111點至27002點，其後一度倒升40點至27155點，惟反彈力度不足，下午曾跌至26850點，最後收26901點，跌213點，全周跌452點， 恒指正式失守27000大關，五窮月累跌2798點！
國家商務部表示，中美貿易談判，重大原則上中方決不讓步，達成協議需要美方拿出誠意。同基金經理閑談，佢話宜家中美雙方完全無意思返埋枱傾計，6月20號G20高峰會，話就話習近平主席有機會同特朗普會面，但係呢啲都係猜測，就算真係坐低傾，應好難可以一次過傾掂數。
睇返時間表，侵侵明年11月才總統大選，只要明年中之前將個股市推返上去，令經濟數據變返好睇，佢就有機會當選連任，咁即係話由宜家到明年中，最長仲有成年時間俾佢玩，咁佢點會唔盡量用手段來製造恐慌，向中國甚至全世界挑釁。
國內股市方面，芬佬話，你唔好預期阿爺會係呢啲位出嚟托市，近日上海A股稍為喘定，同MSC I指數納入A股生效有關，如果外圍股市再係咁跌，國內股市亦都好難獨善其身。
恒指將出現死亡交叉。
技術上，恒指50天線好快會跌穿250天線，造成死亡交叉。美國杜指幅圖更加肉酸，已經做咗三個頂，回落至頸線，甚至乎舊年嘅低位，有乜奇怪？
杜指三頂回落。
芬佬再補充，我都係打工仔，喺呢D政治市，如果貿然人市博反彈，睇錯咗，輸咗錢，我點向老闆交代？相反，我坐喺度唔做嘢，咪安心等利好出訊號出現，到時全人類一齊追貨都未遲！
尚風
** 博客文章文責自負,不代表本公司立場 **