高銀金融（0530）早前以111.24億元投得啟德4C區地皮，但6月10日公司非執行董事石禮謙要求召開緊急董事會，表示擔心近期發生的社會矛盾和經濟不穩定，決定撻訂2500萬元，不繳付地價的餘額110.99億元買地。
根據基點（Basis Point)雜誌報道，高銀金融的的最大水喉是工商銀行（亞洲）。高銀在過去3年多，4度投得大型地皮，總金額近400億元。
基點雜誌的相關內容。
2016年3月，高銀以63.8億元投得何文田常盛街住宅地，項目可建樓面58.6萬方呎，項目應快將推出市場。同年12月，高銀再投得港鐵何文田站1期項目，總發展成本為130億元，涉及面積約73.98萬方呎。不過，2018年4月，集團主席兼大股東潘蘇通以124.03億元買入上述兩個項目。
2018年6月高銀將旗下的九龍灣高銀金融國際中心，抵押予長實（1113）借取102億元貸款。去年11月，高銀再出手以89億元投得啟德跑道區4B區4號住宅地皮，可建樓面57.47萬呎。而高銀在今年4月已提早還清長實貸款，再將物業即時轉按予由德銀信託。基點指出，今年1月德銀曾替高銀嘗試安排68億元貸款，其後暫緩，改為在今年3月安排一年期的34億港元貸款。不過，不知這兩筆貸款最後有沒有真正借出。
至於工銀亞洲，除了在2017年2月借出一年期31.4億港元1年期貸款予高銀旗下的何文田站項目外，亦曾經在2017年5月，安排71.91億港元4年貸款與高銀集團持60%的附屬，其後更在二手市場買入其他4間銀行的此筆貸款，獨力孭上身。此等貸款，均是以九龍灣的高銀金融中心作抵押品。
高銀近年多次投得地皮，但其財務狀况令市場關注。據集團中期業績，截至2018年12月底，銀行借貸除了上述的71.92億元外，尚有持50.1%的附屬的一份42個月年期的循環貸款融資，最高金額是82.3億港元。以及持60%的附屬6個月期限的貸款融資，最高金額為33億港元。加上由非控股股東提供的貸款為22.6億元，流動負債總額213.5億元，但現金及銀行結餘只得6112萬元。
不過，集團指，去年12月31日止，債項對總資產比率維持在53.7%，仍是健康水平。
表面睇，高銀仍然有好多銀行水喉支持。
尚風
** 博客文章文責自負,不代表本公司立場 **
616大遊行後，今日睇新聞，指有業主劈價出貨，究竟呢個是否樓市轉勢的訊號？
睇返呢兩個劈價盤，一個係沙田第一城低層327方呎細單位，兩個月前同座同類貨造價630萬元，現時以533萬元成交，呎價16299元，低市價15%，平近一球。另一個係荃灣中心高層兩房515呎單位，減58萬以642萬賣出，呎價12466元，其實是合理價。而上車天堂嘉湖山莊，屋苑600萬元內三房單位放盤上月一度絕迹，但目前已有10個放盤。有地產代理界話，部分行家好鐘意放成交得到的劈價盤消息出街，製造一下樓市下跌的氣氛，等業主叫價不要企得咁硬，希望可以有多的成交。
圖:沙田第一城現劈價盤。資料圖片
中美貿易戰發生在前，香港反逃犯條例大遊行在後，特別是見到滿街都係人去遊行，好有2003年大遊行時代樓價大跌時的味道，毫無疑問影響樓市氣氛。一連兩星期大量市民上街遊行，邊個得閒去睇樓，所以觀望氣氛濃厚係正常，在呢種環境下願意去睇樓又敢還價的買家，自然容易買到劈價盤。睇番全港10大屋苑6月至今僅錄約54宗成交，較上月同期約84宗跌逾三成，成交得到的單位，大多係業主願意在價錢上有鬆動的單位。
同業內人士傾過，佢話睇樓的人一定係少咗㗎啦，但又真係唔覺得有好多業主好急放盤，又或者願意大幅減價去賣樓。老實講，宜家買樓壓力測試要求咁高，就算個市有乜波動，只要大家保得住份工，過得壓力測試的業主供樓就無問題。而且樓市急升之後，三年或以前買樓的業主，全部都有豐厚利潤，唔會太心急賣樓。當然，唔排除有個別業主想套現，或者是早年平價買入的單位，賺少啲也冇所謂，所以願意大劈價，但畢竟是少數。
致於有實力揸兩層樓嘅投資者，一層自住，一層出租，佢哋亦唔心急賣咗層收租樓，因為套現之後，D錢都唔知擺係邊，以前股市好就話買股票，宜家個股市咁難搵食，買股票隨時輸錢，所以免得過都唔會隨便賣樓來炒股，因為之後如果想買返第二層樓，要俾15%辣稅，手續費太高了。
樓價仍然硬淨，以將軍澳為例，新都城有個實用363方呎嘅單位微減12萬以668萬元售出，呎價18402元，其實都係市價範圍。一手方面，暫時未有動靜，之前賣得非常好的會德豐同地鐵合作的樓盤Montara, 其實好多投資者等緊佢幾時推出第二期。不過發展商可能偏向等埋6月29號G20峰會，睇埋習近平主席會否同特朗普會面，然後先再作部署。
隨着康城站的商場明年就會開幕，到時配套齊全，周邊樓價隨時會追上將軍澳其他區。所以好多潛在買家都虎視眈眈，特別係用家，如果可以折實用600幾萬買到兩房，900幾萬買到三房新樓，其實好多人都願意入市。不過睇返第一期，當時有18,000張票，得600幾個單位，好多人都抽唔到，能否買到呢啲新單位都要講運氣。
港府已經暫緩修訂逃犯條例，暫時消除了投資者一個主要的疑慮，焦點又重回到中美貿易戰上，且看事態發展如何？不過好多投資者都記得，佢哋舊年貿易戰打到如火如荼嘅時候，係10至12月賣咗層樓，宜家都買唔番，因為個價又升凸咗，揸住樓嘅人，都驚歷史重演，所以都好惜售。
