許仕仁涉貪案審咗百幾日，9人陪審團終於在今早開始退庭商議。外界都幾關注，陪審團會退庭商議幾耐先有結果，使唔使過夜呢？估計都要過夜明天先有裁決啦。
法官提醒陪審員要逐條控罪審議，起碼有7對2或以上的裁定(8對1或全部一致都得)，6比3或者5比4都唔得。陪審員在商議期間要交出所有通訊工具，入咗陪審員室後就「與世隔絕」。如果今晚都無裁決，法官夜晚8時45分先俾佢哋休息，明天繼續。
講開陪審員房間相信無咩人去過，據知高院有5間陪審員房，每間房入面仲有兩間獨立細房，入面有床、衣櫃同書桌。至於洗手間，就設喺獨立小房外面，即係要二人共用，規格同三星級酒店差唔多。
2002年高等法院裝修陪審員房的廁浴室
陪審員都可能預咗有排商議啦，今朝就見到有位陪審員拖埋喼去法院，個樣預咗過夜有衫換。另外一位就攞住袋香蕉，睇嚟驚肚餓時可以食蕉頂吓肚。
至於五名被告，許仕仁無乜表情，心情似乎唔靚。郭炳聯一如以往，喺庭上密密手寫筆記，關雄生同陳鉅源則有啲發呆。據聞郭炳江就附近六星級酒店開定房，由律師陪同等結果。
法官批准五個被告繼續擔保外出同離開法院大樓，但就希望佢哋留喺離法院10至15分鐘步行路程的地方，陪審團有結果可以快啲叫到佢哋返嚟啦！
Ariel
** 博客文章文責自負,不代表本公司立場 **
中國地產商進軍香港市場愈來愈進取，內地第一大房企萬科，剛剛又入標油塘鯉魚門徑地皮。
萬科總裁郁亮接受傳媒訪問，對佔中這個敏感問題，沒有多大興趣去講，只係話「無論是否佔中，萬科都很有信心」。但講到進軍香港，佢就相當積極，話萬科只是「小學生」，要向各大香港發展商學習。又話香港的定位對中國既獨特又重要，近年越來越多內地房企進軍香港，證明「香港地方好」他們對「大塊、小塊地，我都有興趣！」
萬科是內地房企一哥，今年頭11個月合約銷售高達1,911億元人民幣，今年銷售毫無疑問能突破2,000億元大關。近年已開始進軍香港，兩年前先夥拍新世界合作發展西鐵荃灣西站六區（TW6）項目，學吓嘢先，摸熟個市場。今年4月以8.6億元購入的灣仔聯發街12至24號地盤，每呎樓面地價1.36萬元。到油塘鯉魚門徑地皮招標，萬科亦係獨資入標。
以中資計，中國海外、華潤集團、世茂等早有在港買地起樓，萬科近年亦開始積極，另外保利置業年初亦以逾39億元較高地價，投得啟德地皮。
內地樓市仲係比較呆，所以內房公司想到香港找機會。萬科郁亮話，除了北京、上海外，內地很多城市的樓房庫存壓力仍然很大，正常合理去庫存水平是少於10個月，大部份城市平均需要13個月去庫存，不過中國地價根本沒跌過，房價沒漲，但地價在漲，大家都不敢買，怕賺不到錢。
政府消息人士十分歡迎內房商打入香港，政府想加大樓宇供應，推多啲地，但本地發展商就話建築費貴，只願低價投地，不時有流標事件，亦搞出樓價不斷創新高，但地價賣得低的現象。若多啲內地發展商入香港，他們投地進取，地皮去貨較快，增加競爭，點都係好事。
