肥佬黎「河蟹路線」要公告天下

佔中之後，阿爺都未郁手，《蘋果》已經動作多多去應變，《蘋果》老細肥佬黎除了辭去壹傳媒集團和《蘋果》的主要職務外，還公告咗一條「河蟹路線」，連《蘋果》中人都睇到眼反反。

事緣《蘋果》昨日有報道提到新社長的葉一堅的講話，堅哥提到他和肥佬黎接觸時，肥佬黎覺得報紙有可改善空間，有時予人覺得太過偏向一邊、一面倒，可以向中間靠攏多一點。堅哥引述肥佬黎指，現時社會因藍、黃絲分裂，傳媒有責任不應令社會分裂，希望社會和諧；有讀者亦指出有類似問題，報紙不能自己想做甚麼便做甚麼，要看社會和讀者需要，「是收起激情，多些智慧的時候」。

聞說連《蘋果》中人見到肥佬黎講呢個「河蟹論」(即是和諧論)，都打咗個突。熟知內情人士話，肥佬黎講乜，堅哥本來唔使在報紙上寫出來公告天下，但如今咁樣公開晒，即係想外面的人都知，有個「保留紀錄」的意思。事關佔中爆咗無耐，肥佬黎覺得佔旺黑打黑好似過咗火位，想叫人收細佔領範圍，但自己報紙前線的小朋友啋你都傻，唔係你老闆話叫我放就放，收就收，報紙上寫的東西一啲都無收，肥佬黎都吹唔漲(雜誌好似緊跟老細路線多一點)。

如今堅哥引述肥佬黎咁講，等如批評份報紙在佔中時太偏、令社會分裂。當然，講衰啲肥佬黎如令一度被捕，將呢的內部矛盾公開，又有少少「份報紙寫乜都唔關我事，我都管佢地唔到」的味道。

知情人士又話，《蘋果》老細沙膽虹在佔中旺季中頸痛放咗個幾月假，回來後以身體理由，向肥佬黎請辭，在這個《蘋果》多事之秋，肥佬黎唔做《蘋果》社長交俾堅哥接棒，自然都會挽留沙膽虹，沙膽可能留任副社長，咁總編輯個位又吉咗出來，要找接班人。肥佬黎講明份報紙要「中間一點」，等如向總編接任人落咗個條件，你食得起做中間報先好做。

在如今紛亂的社會，有狂派又有博派，有忠亦有有奸，要做「忠報」容易，要做「奸報」容易，要做「忠奸報」，有啲難度噃，係唔係又變咗「又要威，又要戴頭盔」呢？

Ariel

** 博客文章文責自負,不代表本公司立場 **

房屋局推長遠房屋策略，炳良局長上港台解話，劏房問題惡化，又成為一個追問焦點。

政府統計處去年進行「劏房」調查，推算全港約有8萬6千多個劏房單位，當中包括5400個板間房、牀位及閣樓等，較長策會於前年委託機構調查推算的6萬7千個劏房單位暴增近三成。不過，政府在長策報告中否決了租務管制、過渡性房屋和劏房登記制三項針對劏房問題的措施，卻未有推出任何解決措施。

港台主持葉冠霖係咁追問劏房多咗三成點搞，炳良局長有少少想唔認增加了三成，話係不同調查，又話只是推算數字。呢種學者上身的答法，好難令人滿意啦。

講到唔搞租管，炳良局話話怕業主揀客，出租單位減少，講到劏房登記，又係怕成本增加供應減少，會令租金更高。佢話唔想「藥石亂投」。

政界中人話，炳良局長和政府的擔心有道理，搞租管和劏房登記確有風險，但唔用這些方法，還有那些方法可用，市民都係想有個答案，唔太理個過程，炳良局長似乎無計。「藥石亂投」當然唔好，「藥石唔投」亦唔係辦法，恐怕不滿情緒會愈積愈高。