肥佬黎先後辭任《蘋果日報》社長後，觸發《蘋果》大執位，人稱堅哥的葉一堅接任肥佬黎社長一職，現任總編輯張劍虹唔想再做總編個位，轉做副社長，所以堅哥唔係做香港《蘋果》的掛名社長，而係由台灣返咗香港，堅做社長。
至於《蘋果》總編輯一職，就未有定論，之前傳過的人選包括前有線副總裁(新聞)馮德雄，以及《蘋果》編採部一個女高層。
人稱阿馮的馮德熊9月離開有線後，未聽聞有特別動向。Ariel早前搵阿馮問佢係唔係入《蘋果》，佢斷然否認話：冇咁事。仲話自己依家好享受悠閒，兼職教書都幾好。聞說堅哥在《蘋果》內部直認有搵過阿馮，話「傾咗100次，佢拒絕100次」，堅哥都好有劉備三顧草蘆的風範，睇嚟仲會繼續努力。
至於女高層，堅哥就認為佢「好激」，「唔需要咁激的路線」，「佢做咗老總日日同我炒咁點算？」聽口氣相當有保留。佔中完結後，《蘋果》有報道提到新任社長堅哥的講話，堅哥提及他和肥佬黎接觸時，肥佬黎覺得報紙有可改善空間，有時予人覺得太過偏向一邊、一面倒，可以向中間靠攏多一點。堅哥引述肥佬黎指，現時社會因藍、黃絲分裂，傳媒有責任不應令社會分裂，希望社會和諧云云。
由堅哥公開引述肥佬黎的立場推斷，《蘋果》呢一刻唔想搵太激的人做老總。
咁多要求好難搵人噃？堅哥就喊出狠話:「搵唔到人做老總，我自己做番囉。」暫時睇《蘋果》走溫和路線的立場都好堅定喎。
Ariel
** 博客文章文責自負,不代表本公司立場 **
佔領運動告一段落，呢個聖誕假期，政壇整體都算平靜。「學民思潮」召集人黃之鋒早前接受前社民連主席陶君行的網台訪問，在「大君伐」節目中暢談佔領運動總結，點咗好多泛民大佬的名，當中表達咗唔少不滿，搞到政壇中人都幾關注吓。
佔中後期，雙學(學聯和學民思潮)經常同泛民開會，之鋒話覺得泛民議員有舖發言癮，當正在立法會開會咁，為講嘢而講嘢，有人想控制雙學:「佢哋想指點，但指點唔到囉！」佢又講吓對泛民大佬的印象，話民主黨的何俊仁個樣容易被人嘲諷，但都算係易溝通的Uncle；至於民主黨主席劉慧卿，就好少喺佔領期間參與開會。
之鋒又話，好彩泛民飯盒會在佔領運動時剛好換咗召集人，唔係之前的召集人馮檢基，形容佢在9.28警察放催淚彈時，喊到豬頭咁；至於呢期飯盒會召集人梁家傑，相對嚟講可以溝通，起碼開會時唔係為發言而發言；被視為激進啲的毓民，之鋒話好少見到佢，唔覺得佢係泛民主派，佢話毓民只係時事評論員，同埋足球評論員比較多，話對毓民無乜期望，所以無失望。
之鋒係咁話泛民大佬們，言語之間都聽得出，同佢地唔係咁「和諧」啦。其實泛民在佔領運動中段，都覺得佔領運動會拖累泛民，成為泛民的政治負資產，力谷雙學撤退，那段時間，雙學同泛民的矛盾已經浮現，特別係學民思潮，因為相對學聯，學民仲激一啲，最後佔領退場，泛民大佬們又走晒出來坐喺度被拉。
睇嚟之鋒對泛民的表現都唔係好順，所以依家走出來力數泛民政客一番，不單對佢哋不滿，亦有可能藉此延續自身的政治能量噃。
