政事
新聞統籌專員馮煒光呢兩日好忙，忙住搞反駁文章，先係投文《明報》，回應有關經濟發展委員會的報道，然後再以1984年港大學生會會長名義，投稿《蘋果》論壇版，反駁佔中三子之一戴耀廷有關要抗衡香港一國化的論述，篇文今天見報。
心水清人士話，新聞統籌專員寫回應文章唔奇，篇文在《蘋果》登，都算係第一次，按《蘋果》過住的邏輯，呢啲官樣文章，可以單手投籃啦。
《蘋果》李八方都有自報佢地登IC(新聞統籌專員)文章，仲講到幾趣。李八方話噚日問過IC，佢撰文係咪獲特首首肯？答案當然都唔使講，IC話查實以前未入政府，都喺《蘋果》投過稿兼登過，懷疑今次係新聞統籌專員呢個職位1999年設立以嚟，首次有IC投稿《蘋果》喎。
心水清人士話，第一次必有理由。從創意的角度，可能《蘋果》的創意大過IC，會唔會佔中過後，《蘋果》都想穩住溫和讀者？
Ariel
** 博客文章文責自負,不代表本公司立場 **
董伯伯開記者會，都有幾多新聞題材，從施政報告到港獨到廿三條，但唔及得一段笑聞吸引。
報道出來的版本係咁，董伯伯在記者會站足一個小時，記者問佢雙腳會否痛時，他笑指自己站得久仍痛。另外就是有記者提問前已自我介紹姓陳，董建華卻反問：「貴姓呀陳生？」
呢個「貴姓呀陳生？」自然成為網絡笑話，背後當然是話董伯伯講錯嘢，甚至諷刺佢老人痴呆。不過近日有接觸過董伯的人同Ariel講，佢同董伯傾過偈，佢頭腦十分清醒，一啲都唔呆，唔係幾似俾人笑那個版本。
再搵番事發時現場片睇，董伯伯習慣問提名記者的姓名，以示尊重。先有一個商台記者提問時話「我係商台陳業輝。」董伯問：「貴姓，貴姓？」記者答：「陳業輝，姓陳既。」
到另一個記者提問時自報「陳家康」的姓名時，董伯接著問：「貴姓呀? 陳生係嘛？」由於「係嘛」二字聲音頗低，聽起想來的確似「貴姓呀陳生？」但細心再聽其實佢是一個重覆確認的提法，確認對方是否陳生。若然以此笑董伯痴呆，又好似偏離咗事實。
參考影片：
