新局長無樓惹猜測

政府公布政治任命官員利益申報資料，好多人都想八吓新任民政事務局局長劉江華以及公務員事務局局長張雲正有乜身家，怎料兩位新貴竟然公布並無在香港和外地擁有物業，令人大跌眼鏡。兩人亦無特別董事職位，皆為馬會會員，亦正常過正常。

政壇八卦友有啲唔服氣，兩個局長都無樓？連海外樓都無？有公務員就話，張雲正一直係政府官， 劉江華太太穆斐文係廉署前社區關係處處長，公務員家庭唔買樓亦都唔奇。而劉江華過去長期競選，買樓投資隨時被批為炒樓，所以唔想投資買樓亦可能有選舉考慮。

講到局長議員樓王，就非行會成員李國章莫屬，亞瑟王出身世家，屋企有米，在香港同倫敦持有32個物業和8個車位，繼續蟬聯樓王。另一行會成員、經民聯林健鋒亦唔弱，有13個物業同15個車位，仲有1幢12層工廈，還在內地有6幅地。 新任行會成員、行政長官創新及科技顧問楊偉雄也屬多樓之人， 同太太在香港同海外合共持有10個物業。

在樓價飛漲的今天，無樓局長和多樓行政會議成員，真係屬於兩個唔同階級啦。

Ariel

** 博客文章文責自負,不代表本公司立場 **

阿爺將於9月3日在北京大搞抗戰勝利日天安門閱兵儀式，除了邀請各國領袖出席外，亦有請國內外人士參觀，包括香港各界人士。

有報導話，前特首曾蔭權獲官方邀請出席天安門閱兵儀式，但煲呔曾已婉拒赴會。煲呔近年的確有少少低調，經常外遊，今年7月1日的回歸慶祝酒會，佢就無出席。

不過呢個報道話佢唔出席北京抗戰勝利閱兵，只屬流料，知情人士話，幾個星期前阿爺已收到煲呔曾的回覆，話佢會上京出席 9月3日北的抗戰勝利紀念活動。

聞說阿爺今次會廣邀香港各界代表人物出席，有些不受邀人士，還在盡最後努力爭取將自己個名塞入去。除了官方人士外，邊個同阿爺friend唔friend，睇吓有無獲邀出席北京閱兵儀式就知。