膠仔身邊有唔少朋友都會因為工作、人際或者金錢等原因跌落情緒低谷。我當然想朋友開心返，但係人哋嘅情緒我又點能夠控制？唯有從個比較正面嘅角度，綜合專家意見加上少少個人見解，講講悲傷有時都係一件好事嚟，希望大家積極啲面對。
有心理醫生話若然覺得唔開心，最好嘅解決方式唔係去尋開心，而係正視呢份感覺，搵個地方大喊一場、搵個人好好傾吓。人從嬰兒時期開始，已經會本能地透過哭喊表達訴求，尋求開解同關心，或暗示需要別人協助。佢話呢樣嘢到我哋死都唔會變，所以我哋唔應該收收埋埋。人前懶開心，獨處時反彈只會更大，最終有可能陷入抑鬱做傻事。
另有心理學家指出，人之所以會覺得傷心，通常都係因為遇到新環境、新難關，就好似小朋友第一次踏足幼稚園，或者突然有親人離世咁，唔多唔少都係因為唔習慣而覺得傷心。換句話說，人喺失意時，往往意味成長緊；積極越過障礙，人會比以前更堅強。膠仔認同，呢啲叫做歷練！
有研究又發現人喺情緒低落時，警覺性同埋觀察能力都會比較平時高，處事亦都較客觀。有人提出情緒低落就應該喺屋企唞吓，膠仔覺得呢個時候反而應該出嚟見多啲人、做多啲嘢。頭腦清楚，識嘅人都會好啲；辦事能力較高，升職加薪係呢期啦！
另外俾篇文大家參考吓：
https://www.braindecoder.com/is-sadness-ok-1353643208.html
神州快訊
** 博客文章文責自負,不代表本公司立場 **
膠仔睇到篇報道，四川有個女作家死咗，家人用75萬人民幣冷藏佢個頭等將來復活，根本發瘟。我唔係咩權威人士，講出嚟無人信，唯有轉述科學期刊，概述一下人體冷藏科技有幾咁荒謬。
加拿大麥基爾大學神經學助理教授Michael Hendricks寫咗篇文，批評人體冷凍技術只係偽科學，嗰啲宣傳可以保存人體等將來復活嘅公司非常賤格，俾啲假希望人以為將來真係有機會復活，呼籲大家唔好信。
佢話近年有唔少人有錢人都唔捨得花花世界，決定死後以液態氮冷藏頭部或者全身，等日後科技夠先進，重新連接腦神經或者復製記憶「重生」。有人更喺瀕死階段已決定冷藏身體，以為咁樣可以更加新鮮，日後復活效果更好，實情等同自殺。
佢多年嚟集中研究一種名為「Caenorhabditis elegans」嘅小線蟲。呢種生物構造非常簡單，全身只有1,000多個細胞，302個神經元連接位置。要造出兩隻基因序列同埋神經連接組合100%相同嘅蟲蟲唔係咩難事，但係咁樣並不等於能夠製造出兩隻個性100%一樣嘅生物。
佢同一班同事試過好多方法，但係全部實驗都以失敗告終。就算兩隻生物基因序列同埋細胞結構100%相同，生存環境相同，遇上同樣情形，兩條蟲蟲嘅活動模式同埋反應都係完全唔一樣。咁簡單嘅生物都無法實現，更何況係複雜到爆嘅人類？換句話說，就算日後有方法從冷凍咗幾十年嘅頭部中復製人類記憶，咁樣都唔算係重生，「你」同原本嘅你已經有好大分別。
最後引《春秋》一節作結，寫道人生追求嘅係「三不朽」，即立德、立功、立言，大意如下：「人生最高成就係樹立德行，其次是建功立業，最後是留下名言。能做到呢幾樣嘢，死後都唔會俾人遺忘，咁樣先叫不朽。」
上邊講咗啲咩，自己參透吓，以下係原文：
http://www.technologyreview.com/view/541311/the-false-science-of-cryonics/
