肥馬唔再做「馬拉松」

這一陣子香港政壇風起雲湧，各方特首候選人都有少少異動，有縮縮地的態度，其中一個係前財爺梁錦松。

松哥係惜食堂主席，昨日(周四)佢請傳媒食飯，被問及佢近期仲同一班教育界人士研究改革教育制度，咁多動作，怕唔怕俾人話想選特首？松哥話唔擔心，仲話「唔一定要做特首，嗰個唔一定係好位」，仲話自己係被誤會想選特首啫。

眼利少少的朋友，話松哥口氣同個幾月前唔同咗，佢8月底接受傳媒訪問，被問及參選特首的問題時話，「回望自己人生每次重大改變， 都從未經計畫，若上帝要你做，一定逃不掉」。

政壇八卦界人士話，松哥由選唔選「交俾上帝決定」，到話「 特首唔一定係好位」，口氣變咗喎，如今唔似咁積極。

八卦界人士仲話，松哥的老友馬時亨兩個星期前同朋友飯局，被問起會唔會為松哥助選，因為肥馬過去講過「馬拉松」，話松哥出來參選，他會做競選辦主任。點知當時肥馬擰晒頭，話唔做啦唔做啦，「唔再馬拉松，等阿松自己做爬松啦」。

肥馬一句「爬松」，叫阿松自己去爬，雖然講笑， 但都似想和阿松參選劃清界線。八卦界人士話， 呢番話係兩個星期前講啲，近排的事情尚未發生， 但肥馬已有縮沙之意，可見呢個選特首遊戲，似乎愈來愈唔易玩喎。

Ariel

** 博客文章文責自負,不代表本公司立場 **

經民聯監事會主席林建岳搞智庫，名為「香港文化協進智庫」， 岳少親任主席，正如Ariel早前所講，岳少拉得《文匯報》 前總編輯李曉惠出任智庫擔任總裁， 岳少話希望其智庫可在政策研究方面，為國家、為香港做點實事。

岳少的智庫自然星光熠熠， 但昨日政圈熱議的卻不是智庫中的香港猛人，而是內地富豪、 人稱千億炒家的肖建華，肖建華的明天系股份在內地赫赫有名，炒到風起雲湧，而他本人經常不在內地，主要在香港居住，是四季酒店常客。

7月內地股災後，肖建華有一段時間沒有現身，但近日突然出現在岳少的智庫成立典禮上，在官方發表的照片中，前排左二位置的就是蕭建華，岳少搵肖建華咁大爭議性人馬入局，政壇中人皆嘖嘖稱奇。

智庫另一個八卦話題是國際關係學者沈旭暉出現在智庫名單上，指他將任智庫特約研究員，不過，沈旭暉期後在他的Facebook專頁澄清，「相信這是其內部溝通出現的小誤會，我雖是友好， 而並非成員，也沒有研究香港問題。 如日後林先生有興趣研究國際關係，相信定有合作空間」。 好似想劃清界線咁款。

岳少搞呢個「香港文化協進智庫」， 擺明想成為下屆特首選舉的造王者，否則智庫咁多，人逼逼，岳少點會咁得閒搞埋一份呀。