湯家驊同譚詠麟夾過Band

今早聽到港台主持車淑梅在「舊日的足跡」 的節目訪問已脫離公民黨的湯家驊，內容都幾有趣。

車淑梅都好識問敏感問題，劈頭就話「湯家驊黨內孤身走我路，擺香港利益為先，你想過做持首嗎？」湯家驊話關注政治的人，一定想過自己做特首的問題，佢都有想過，例如想假如是自己做， 會不會比現時的特首做得好，但他不會以做特首作為目標。

佢話選特首有分普選同唔普選，普選或者機會多啲，但唔普選由選舉委員會選出，特首要百分百得到中央信任，他雖然和中央有溝通，但就唔係百分百得到中央信任的人。 佢又話佢選特首不會做陪跑者，明知唔得不會出來試(有少少暗諷選過特首的梁家傑)。

湯家驊又話，08年立法會討論版權條例時，佢好激氣，余若薇走落嚟問佢，「 你幾時走，你走早啲通知我。」湯家鏵話我有事未做好，不會為余若薇及梁家傑而走。佢要做三件事，一競爭法， 二最低工資，三是普選，現在走，頭兩件事做咗，普選未做好。

不過Ariel可能有少少政治冷感，對湯大狀講佢年青夾band玩音樂更感興趣，佢話佢後生夾band玩電子琴， 四圍去表演賺錢，有一次去一間中學表演，在後台有個後生仔走埋去問佢叫乜名，佢話「我叫Ronny。」 對方話佢叫Alan，就係譚詠麟， 譚詠麟講起而家好少人彈電子琴，佢隊band差一個人彈電子琴， 叫湯家驊加入，咁就走埋一齊。

後來鑽石唱片的Joe Junior搵佢地隊band去錄歌試音，想幫佢地出唱片，佢地錄咗幾首歌，但Joe Junior後來話，譚詠麟的英文咬字口音不正，放棄同佢地出唱片，佢哋好沮喪，湯家驊亦離開咗。 若然當年成功出唱片，湯家驊可能做咗歌星，並無做大狀，亦無從政。可見人生的確有好多偶然。

Ariel

** 博客文章文責自負,不代表本公司立場 **

立法會下周復會，昨日先選舉內務委員會及財務委員會正、副主席， 由於今次建制派和泛民協調失敗，未能有過去建制派做正、 泛民做副的安排，結果兩個會的正副主席悉數由建制派囊括。

經民聯梁君彥以14票之差，擊敗民主黨單仲偕連任內會主席，馬逢國則以5票勝過單仲偕擔任內會副主席。財會方面，保險界陳健波以38票，擊敗獲18票的民主黨主席劉慧卿，出任財會主席，劉再角逐財會副主席，以11票之差敗給民建聯陳鑑 林。

自由黨倒戈支持泛民，亦相當出位，在內會副主席選舉時最明顯。自由黨一早話明會支持民主黨角逐內會副主席，所以未投票前，單仲偕見到自由黨大佬田北俊，即上前握手，兩人拍晒膊頭，睇落非常老友。

馬逢國最後以32票擊敗獲27票的單仲楷，只以5票之微弱多數， 當選內會副主席，計一計單仲楷的27票，當時有22名泛民在席投 票，加上自由黨4票，再加一名建制派倒戈支持單(估計是自由黨的 友好)。單仲楷輸咗之後，都有走去多謝自由黨支持。

經過呢次內會選舉，建制派分裂之勢非常明顯，自由黨變成半個反對黨。之前有傳過自由黨和民主黨傾合併，Ari el覺得只是吹水，兩黨在民生議題分歧太大，好難合併，只能在同時反對政府的議題上合作。

高人話，自由黨反特首CY反到出晒面，田少早前被阿爺取消全國政協委員資格，但自由黨還是愈走愈遠，今次選舉公然倒戈，估計阿爺都要重新計數，去評估同自由黨的關係，在關鍵時刻不能假定自由黨一定會投票支持。

高人又有疑問，自由黨背後的支持者是大商家，到底是否同意自由黨同泛民合作的路線？商人也要計數，自由黨這樣走下去時，到底對香港商界是好是壞？