品牌搞crossover見得唔少，政黨都搞這套，又的確幾新鮮。
建制派的自由黨同泛民主派的民主黨今日召開兩黨聯合記者會，目的係向政府提出共同醫療改革建議。兩黨仲預告，今次只是頭炮，合作日後陸續有來。
兩黨今次破天荒手牽手同政府拗手瓜，係聰明之舉。民主黨屬溫和反對派，不時被激進反對派攻擊，立法會內只有6個議席，力量奀奀地；自由黨在建制派內亦屬另類，經常唔跟建制派大隊走，係建制派的「壞孩子」，立法議席只有5個，兩個黨都比較弱的政黨，不過，一旦走埋一齊，牙力唔細。
但兩個黨一個係基層政黨，另一個係工商政黨，究竟有何共通點呢？論理念，論黨格，其實真係無任何共通點，唯一的是大家都唔聽話，喜歡同政府作對。最近幾次比較大的議案投票，例如動議用《特權法》調查免費電視發牌，兩個黨都係投贊成票。最近的《雙辣招》條例，民主黨棄權退席，自由黨都仲係投反對票，取態比民主黨更激。
呢個「反政府」的共同點，可以係一度非常強力的黏合劑。
有政壇高人就話，如果自由黨與民主黨，已有11席，已經好接近有13席的最大黨民建聯，萬一再拉埋有4席的工黨，搞一個連線，15個議員共同進退，咁CY政府將面對的壓力就大囉。
政界無所謂朋友和敵人，過去建制派同泛民派各為其主，打生打死，但如今面對更大共同敵人，又會走埋一齊，拍吓拖，玩吓CY，真係有戲睇啦。
盧永雄
議員在立法會嗌交，好多時係為嗌而嗌，與市民所關心的事情，背道而馳。
香港年輕人最不滿的事情之一是樓價太貴。政府推出「雙辣招」打擊炒樓，樓價近排稍為企穩，但距離一般市民的負擔能力仍然好遠，他們還希望樓價可以再低些，民心所向，顯而易見。
上周政府在立法會動議審議俗稱「雙辣招」的條例，請留意，這條法案並非「加辣」，而只係確認正在實行的「雙辣招」政策。本來以為控制樓價符合民意的法案，要通過立法會，理應「食菜咁食」，誰知過程中波折重重，差不多要把法案玩死，政府亦驚出一身冷汗。好彩議員玩到最後一刻，尚能保持丁點克制，22名泛民議員，選擇離席，沒有投反對票。反對法案的建制派也不敢走清，有足夠人數開會，最後投票通過法案，沒有搞出個大頭佛。
今次攞晒分的是「社民連」長毛及「民建聯」的李慧琼。我向來不大喜歡長毛的過火行為，即是「係又掟嘢唔係又掟嘢」那一種手法。不過，今次長毛專登走回立法會投票，發言時表明不是支持梁振英政府，但係支持要呢個政策。長毛在涉及市民關心的大問題上拒絕再玩，證明佢識得揀嘢嚟玩，值得俾個Like佢。相反其他在呢次投票上玩嘢的泛民議員，就大失民心。長毛順住呢個勢落去，不止後生仔票，連中產票都可以搶埋，仲係搶咗其他泛民議員的選票，他在下次分區直選，隨時可以帶多一個人入立法會。
反觀建制派陣營亦一樣，好多人平日好似好支持政府，到關鍵時刻就閃咗。立場比較鮮明地支持法案的李慧琼就攞晒分啦。李慧琼平日給人的感覺斯斯文文，與長毛剛剛相反，長毛特壞，佢就太乖，沒有棱角，遠不如她的師傅曾珏成那樣出彩，不過她在今次企得相當硬，和工聯會王國興一齊力數那些反對議案的議員要為樓價上升負責，攞到唔少分數。打完呢場仗，才令人覺得政府無搵錯李慧琼做行政會議成員。
好多建制派議員平時向政府攞這種著數，那種著數，但在關鍵時候就閃了，行為令人側目。相反部份泛民議員也如是，平日為民請命，關鍵時候突然和民意對著幹，無論建制派與泛民主派，都有不少古惑仔呀?
盧永雄
