早兩日Ariel行完街街巧遇一個建制派大老級人馬，佢講起一份報紙的情況，講到七情上面，可以同大家分享一下。
大老話份報紙在內地民間搵咗少少水就開工，邊行邊籌旗，搞手四圍同人講佢係「中央派來的」，你知大家聽到呢句話都敬仰三分，亦唔敢問得太清楚中央係乜水，吹吹吓本來搵到兩個本地富豪話支持，都算順風順水。
但事件曝光後有少少亂，個兩個富豪就走去問中聯辦領導，有無「中央派來的」呢件事呢? 點知中聯辦領導答得好乾脆:「沒有喎，沒這事，不用支持。」那兩個富豪一聽完就縮沙啦。Ariel馬上追問建制派大老係邊兩個富豪，佢老人家就話唔好開人個名啦，都唔知人地鐘唔鐘意。
講講吓又提到另一件事，原來報紙的女搞手，早兩三個月曾和內地財經女名咀胡舒立，一齊上去拜訪香港一個超級富豪(女搞手又唔知點解拉到胡舒立一齊)。女搞手話自己搞緊份報紙，叫超級富豪支持，您老人家唔使出資架，將來射啲廣告過來就得架啦。超級富豪見識過人，就答謂「好呀好呀，你搞咗出來我再睇睇呀。」幾句睇睇就送客。
有高人又提到，留意吓《文匯》、《大公》，睇吓仲見唔見到某個評論員的文章(該報的男搞手)，就知道阿爺對呢件事件的態度。
講來講去，就係未有大水落叠。高人分析，既然阿爺唔支持，成件事倒轉嚟諗，最後萬一真係搵到錢，只能夠從唔妥阿爺的有錢佬那裏度到水，不過香港呢類人就有限啦，睇吓佢地好唔好彩啦。
Ariel
** 博客文章文責自負,不代表本公司立場 **
因為搞報紙事件而惹人注目的左派人士蒯轍元，原來不止活躍評論政治，早兩年仲一度想搞公司上市。
同財經界人士傾偈，有位朋友竟然識得蒯轍元，佢話蒯轍元當年已經同搞《新晚報》的夏萍玩埋一齊，仲想搞上市咁話，呢位朋友仲同佢地兩個一齊開過會。
原來蒯轍元和夏萍一直有搞華商雜誌，每年又搞華商領袖獎，跟手又搞華商領袖網，呢啲頒獎禮當然都係有生意眼的活動，而佢哋當時力推個華商領袖網，叫人入會俾50萬、100萬會費，仲話會員全部好有身份地位，入咗會可以接觸到李超人呢類猛人，有乜建議書可以放到這些猛人的郵箱咁話。
佢哋當時搵咗海通證券幫手，想話將華商領袖網呢堆業務，包裝上市，希望集到10億咁話(係10億，唔係寫錯呀)，若然以發25%新股集資10億咁計，即係成件嘢要估值估到40億! 呢啲咁虛幻的東西，想集資10億，當然難度極高，最終都係搞唔掂。咁佢地就搞出一份《新晚報》，覺得搞免費報紙實質啲，若然搞得掂當然可以上市啦。
不過《新晚報》搞咗兩年又唔係幾掂，最近又話變收費報唔知想點。不排除有人諗頭多多，又有新概念睇試吓搵唔搵到老細支持囉。不過香港報業競爭得咁厲害，想搞報紙真係一啲都唔易啦。
