兩會一嚟就開波，在中央港澳工作協調小組組長張德江會見政協的場合，唔止阿爺發炮，台下委員亦配合開炮，政協常委李家傑點名指港大民意研究計劃總監鍾庭耀在關鍵時候，發表不利的民調結果，為反對派營造民意基礎。唔理你同唔同意傑哥的意見，佢呢次一出聲就出咗位喇！
有人好奇怪，話點解阿爺特別安排傑哥在有記者在場時開炮，等傑哥出晒鋒頭。不過知情人士話，只因為按排名擔任的職務，傑哥是常委，所以俾佢講先，唔係優待佢在記者面前發言。
不過傑哥篇發言稿雖然惹火，但寫手落筆時亦經常精心設計，傑哥隊鍾庭耀之餘，並唔係叫本地人做民調，而係叫商會合作成立一個民意調查基金，邀請國際上著名的民調機構，和中大及科大等大學會合作一齊做。雖然鍾庭耀反隊李家傑干預學術自由，但如果最後真係搵咗國際有名民調機構來香港做民調，鍾庭耀都唔易話人地唔得只係佢得喎。
有高人話，李家傑強硬發言不是孤立現象，相信唔止佢硬，其他人大政協都會硬，佢地都係收到阿爺的精神感召，知道要出來打仗囉。
Ariel
** 博客文章文責自負,不代表本公司立場 **
早兩日Ariel行完街街巧遇一個建制派大老級人馬，佢講起一份報紙的情況，講到七情上面，可以同大家分享一下。
大老話份報紙在內地民間搵咗少少水就開工，邊行邊籌旗，搞手四圍同人講佢係「中央派來的」，你知大家聽到呢句話都敬仰三分，亦唔敢問得太清楚中央係乜水，吹吹吓本來搵到兩個本地富豪話支持，都算順風順水。
但事件曝光後有少少亂，個兩個富豪就走去問中聯辦領導，有無「中央派來的」呢件事呢? 點知中聯辦領導答得好乾脆:「沒有喎，沒這事，不用支持。」那兩個富豪一聽完就縮沙啦。Ariel馬上追問建制派大老係邊兩個富豪，佢老人家就話唔好開人個名啦，都唔知人地鐘唔鐘意。
講講吓又提到另一件事，原來報紙的女搞手，早兩三個月曾和內地財經女名咀胡舒立，一齊上去拜訪香港一個超級富豪(女搞手又唔知點解拉到胡舒立一齊)。女搞手話自己搞緊份報紙，叫超級富豪支持，您老人家唔使出資架，將來射啲廣告過來就得架啦。超級富豪見識過人，就答謂「好呀好呀，你搞咗出來我再睇睇呀。」幾句睇睇就送客。
有高人又提到，留意吓《文匯》、《大公》，睇吓仲見唔見到某個評論員的文章(該報的男搞手)，就知道阿爺對呢件事件的態度。
講來講去，就係未有大水落叠。高人分析，既然阿爺唔支持，成件事倒轉嚟諗，最後萬一真係搵到錢，只能夠從唔妥阿爺的有錢佬那裏度到水，不過香港呢類人就有限啦，睇吓佢地好唔好彩啦。
