全國政協係一個超級統戰系統，分吓餅仔，聯誼一下，做埋常委就更加威威，等如部長級架。
不過依家中央要執正嚟做，對所有人都有要求，新一屆政府更係雷厲風行，京城個個官員都乖到你唔信，話說有人想請部委官員食餐飯，換著平日易過食生菜，今時今日，多數官員都推，就算肯出來的，指明唔去私人會所，唔入包間(包房)，一定要坐在大堂公眾地方食。
官員執到咁正，平日俾人感覺飲飲食食的政協開會，氣氛都有啲唔同，第一炮當然要數平時唔聲唔聲的政協常委李家傑，突然喺會上發炮，轟羅拔.鍾(鍾庭耀)，事前一啲先兆都冇，事後搞到個個富豪眼超超，想問發生咩事。
傑哥發言後好低調，唔單止對住記者話唔再評論，連平時一齊嘻嘻哈哈的委員都問唔到底細，其他商會負責人就更摸不著頭腦，點解傑哥話搞商界民調基金，佢哋都唔知，有啲仲覺得俾人拖落水。
雖然富豪眼超超，但又覺得發言稿應該有關部門事前都睇過吓，唔會純粹個人意見，搞到佢哋對住記者追問時，唯有大耍太極。
唔少人大政協上到北京，都感覺到依家阿爺真係幾硬呀，亦都一副準備上戰場格局，氣氛同以往好唔同，所以唯有齊齊發聲反佔中。至於未係常委、又好想做常委的富豪，仍然忍唔往扣吓阿爺門，問吓而家勇啲打仗，將來係唔係大啲機會升「呢」？
Ariel
** 博客文章文責自負,不代表本公司立場 **
兩會一嚟就開波，在中央港澳工作協調小組組長張德江會見政協的場合，唔止阿爺發炮，台下委員亦配合開炮，政協常委李家傑點名指港大民意研究計劃總監鍾庭耀在關鍵時候，發表不利的民調結果，為反對派營造民意基礎。唔理你同唔同意傑哥的意見，佢呢次一出聲就出咗位喇！
有人好奇怪，話點解阿爺特別安排傑哥在有記者在場時開炮，等傑哥出晒鋒頭。不過知情人士話，只因為按排名擔任的職務，傑哥是常委，所以俾佢講先，唔係優待佢在記者面前發言。
不過傑哥篇發言稿雖然惹火，但寫手落筆時亦經常精心設計，傑哥隊鍾庭耀之餘，並唔係叫本地人做民調，而係叫商會合作成立一個民意調查基金，邀請國際上著名的民調機構，和中大及科大等大學會合作一齊做。雖然鍾庭耀反隊李家傑干預學術自由，但如果最後真係搵咗國際有名民調機構來香港做民調，鍾庭耀都唔易話人地唔得只係佢得喎。
有高人話，李家傑強硬發言不是孤立現象，相信唔止佢硬，其他人大政協都會硬，佢地都係收到阿爺的精神感召，知道要出來打仗囉。
