曉明哥親”筆”抒文悼許老

四大護法之一的許崇德在兩會期間過世，許老大半生從事基本法研究，現時中聯辦話事人曉明哥，之所以從政踏入港澳事務，原來都係得許老推薦。當年，曉明哥在人民大學法律系碩士畢業後，聯繫到港澳辦工作，港澳辦就委托許老了解這個年青人的情況，最後許老推薦曉明哥入職，曉明哥從此與港澳工作結緣喇。

中聯辦網站上載咗曉明哥追念許老的文章，仲透露咗當他要來港履新，許老仲私下寫信俾香港的好友，請佢哋支援同幫助曉明哥工作，呢位恩師都真係唔話得，所以曉明哥都感言同許老冇門生之名，但就有師生之實。

聞說話曉明哥都幾重視呢篇悼文，寫文時正開緊兩會，今年特別嚴格唔俾人大政協委員隨便請假唔開會，高官都冇得走雞，曉明哥只能抽空，喺會與會之間搵時間寫，在智能手機上用手寫成，所以話篇文真係「親手」寫成架。

曉明哥原文：

http://big5.locpg.hk/gate/big5/www.locpg.hk/jsdt/2014-03/12/c_126255802.htm

Ariel

** 博客文章文責自負,不代表本公司立場 **

港視流動電視牌照風波再起，維基在昨日記者會大呻政府搬龍門，搞到佢哋唔可以如期開台，仲攞住一個接收器，話係上一手做流動電視的中移動，都係用呢個接收器，俾客戶駁去電視機睇節目啦。

維基在記者會上一表演，馬上有電視業人士提出，過去一直有留意中移動搞流動電視，從無聽過佢搞過接收器入屋，質疑維基在記者會上展示的所謂「中移動接收器」，只係「鴨寮街貨色」。

我地就維基哥係唔係攞住「鴨寮街貨色」話係中移動接收器呢個問題，向港視求證，港視發言人話以前喺香港中移動的官方網頁，有列出適用的電視型號。我地叫佢俾部接收器我地睇睇，睇吓有無中移動Logo。港視發言人承認個接收器上沒有中移動的Logo，但就堅持話的而且確係從中移動度得來，可以駁入電視機中。

有接近中移動的消息就指，中移動話冇研發過呢種接收器，佢哋冇賣。但就知道在內地有得賣，主要裝喺啲旅遊巴上，可以接受到流動電視的訊號，但質素有幾好，坐過長途車的朋友都知道，估計鴨寮街應該有得買。

今次真係羅生門喇，不過，羅生門仲未完，維基就話港視從無話過提供入屋電視服務，但有網民就話喺香港電視的官方Facebook專頁，早在去年12月20日上載了題為「如何收看HKTV香港電視的方法」合共十一張相片。

圖片來源：香港電視Facebook專頁圖片

 其中一張相片仲話香港電視可支援的裝置包括手提電視、智能電視、流動電話、個人電腦、手提電腦、平板電腦和智能電話。有圖文並茂（下圖紅框示）講解如何將接收器接駁電視，再透過流動電視無線電頻譜接收港視的直播頻道煲劇同其他節目。

圖片來源：香港電視Facebook專頁圖片

港視發言人回應指，圖中所示並非直接用大廈公共天線入屋，與免費電視不同。發言人補充問政府，若果使用政府話可以用的歐洲DVB制式，日後電視機加了接收器，收到香港電視的訊號，港視是否又要更換制式或再申請牌照？發言人說，根本的問題是大廈公共天線過濾器的管制，如果做好了，港視用甚麽制式，住戶也不能透過公共天線接收得到。

睇完回應有啲一頭霧水，咁即係維基想唔想港視入屋呢? 有業內人士就提，其實所謂DVB係內有文章，DVB分幾類，通訊局建議港視用的係DVB-H，即係DVB制式中，專門俾流動電視用，DVB仲有DVB-T、DVB-C、DVB-S三個類別，多咗三個英文字母喺尾大不相同，分別俾免費電視、有線電視同衛星電視用的制式，所以通訊局應該唔會籠統白紙黑字話港視可以用 DVB制式喇。