阿爺發英雄帖請包括泛民全體議員去上海，但民主派元老發晒功，話上海萬萬去不得，搞到泛民議員去又唔係，唔去又唔係，去即係唔聽民主元老話啦，唔去又即係阿爺叫你溝通你都唔受溝啦，左右不是人，有少少唔上唔落。
結果就各師各法，據初步消息話，民主黨不會全體去，甚至大粒議員都唔係咁多人去，民主黨主席卿姐就傾向唔去喇，由中青代議員做主力北上，即係胡志偉 、黃碧雲肯定會去作先鋒，好多大佬級議員都未決定去唔去。
公民黨也不是全數去，主席梁家傑會捧場、主張溝通的湯家驊會去，毛孟靜就多數不去，總之公民黨可能多啲大粒議員北上，但都唔係去齊人。
其他泛民如長毛話去，不過係去玩嘢。支聯會主席仁哥唔去，上次去廣州此情不再。
其實政制檢討就到攤牌埋牙階段，本來都唔係咁客客氣氣，再加上泛民元老根本就係一個企硬態度，阿爺硬佢地鬥硬，看來泛民元老要百分百按自己意思行，叫阿爺都唔使傾啦。咁樣到今年秋天佔中勢所難免，而且佔起上來，都唔係講玩笑嗰隻喇。
Ariel
** 博客文章文責自負,不代表本公司立場 **
馬航客機失蹤踏入第十一日，大馬政府好似「擠牙膏」咁發放訊息，出事後連日開記者會都無料到，喺大馬採訪的記者嘲笑，朝早起身睇美國報紙，知道馬航原來轉向西；下午睇歐洲報紙，知道原來有可能降落六百幾個機場；然後傍晚聽大馬的現場記者會，就係否認大部份傳媒的報道。
到歐美媒體愈揭愈多，終於大馬政府開始改口，雖然大家對客機去咗邊仲係一頭霧水，但依家已愈來愈傾向相信有被劫機的可能性。今次發威的都係歐美大媒體，挖掘真相的能力超晒班，一啲內地傳媒用了大批人力物力去採訪，換來以下的感慨：
【當問題來臨，我們忙在哪個層次？】CNN司法口老記找到國際刑警做實了假護照的問題；WSJ挖掘羅羅引擎線索，披露了折返的資訊；NYT認定轉向西，很可能從美政府線人處拿到了雷達資料；ABC第一時間披露了眾包搜索；BBC等最後找到衛星公司，讓我們知道了最後時間是8點11分。中國的媒體在祈禱和轉發……
呢段文章在內地的社交網站被瘋傳，除咗傳媒人的感慨，亦惹來網民唔少批評聲，好似有記者登上內地船隻參與搜救，問題係依家到底客機係墮海定係北上已經秘密降落都未搞清，記者在茫茫大海上，更加迷茫。
話又講番轉頭，今次爆到堅料的都係歐美主流媒體，佢哋的料睇嚟亦係來自軍方或情報機構，可見歐美的衛星監控、情報數據收集仍係遙遙領先，喺客機失蹤的區域，佢哋仍然係牢牢掌握住空域的控制權。
