金管局陳總終獲續約5年，之後傳過的風風雨雨，都成過眼雲煙。Ariel睇公布他續約的新聞稿，特別留意是以後薪金如何定奪，似乎經過財爺和陳總細意斟酌。
陳總現時合約基本人工600萬沒有每年調整，但有類似花紅的浮薪，加幅無上限。新合約首年基本年薪650萬元，惟往後每年調整不能高於通脹率，新合約首次為浮薪設定260萬元上限，不能超額。
Ariel係打工仔，見到陳總呢個打工皇帝啲人工露晒出來，自然好想同佢計計數，表面睇新合約基本年薪變作可調整，好過舊時。但睇真啲浮薪那部份本來可以大升，而家封晒頂，無乜So。睇往績陳總2011年浮薪升幅高達36%，增至203.8萬元，2012年浮動薪酬再按年大增20.5%，至245.6萬元，年年大升。但未來五年浮薪上限260萬元，估計佢2013年浮薪升幅約5.9%至260萬，之後就能減不能加，即係浮薪無得再加。佢變相成為一個差不多按通脹加人工的高級打工仔，無得再食大茶飯啦。新合約首年基本人工650萬加浮薪上限最多260萬，即係有 910萬現金收入，有少無多啦。佢應該呢世都唔會追到前任總裁任志剛2008年時攞的1,193萬元年薪啦（除非出現超級通脹啦）。
我仲問吓消息人士，陳總基本年薪按通脹調整，咁通縮時點計？消息人士話香港未來出現通縮的機會唔高，但萬一出現時，斷估按陳總合約係可以跟通縮減薪咁話。
結論係陳總差不多變成定薪制，雖然在環球央行行長中佢人工仍然算高，但係就一定比不上新加坡央行行長啦。不過如今社會早已進入批評聲音高漲的時代，陳總人工無咁多，都無咁大壓力啦，食少多覺瞓呀。
Ariel
** 博客文章文責自負,不代表本公司立場 **
阿爺發英雄帖請包括泛民全體議員去上海，但民主派元老發晒功，話上海萬萬去不得，搞到泛民議員去又唔係，唔去又唔係，去即係唔聽民主元老話啦，唔去又即係阿爺叫你溝通你都唔受溝啦，左右不是人，有少少唔上唔落。
結果就各師各法，據初步消息話，民主黨不會全體去，甚至大粒議員都唔係咁多人去，民主黨主席卿姐就傾向唔去喇，由中青代議員做主力北上，即係胡志偉 、黃碧雲肯定會去作先鋒，好多大佬級議員都未決定去唔去。
公民黨也不是全數去，主席梁家傑會捧場、主張溝通的湯家驊會去，毛孟靜就多數不去，總之公民黨可能多啲大粒議員北上，但都唔係去齊人。
其他泛民如長毛話去，不過係去玩嘢。支聯會主席仁哥唔去，上次去廣州此情不再。
其實政制檢討就到攤牌埋牙階段，本來都唔係咁客客氣氣，再加上泛民元老根本就係一個企硬態度，阿爺硬佢地鬥硬，看來泛民元老要百分百按自己意思行，叫阿爺都唔使傾啦。咁樣到今年秋天佔中勢所難免，而且佔起上來，都唔係講玩笑嗰隻喇。
