CP曾偉雄早前話無證據顯示，《明報》前總編輯劉進圖遇襲案與新聞工作有關，予人感覺有刻意淡化之嫌，後來保安局局長黎棟國補鑊，說不排除任何可能性，今日更喺立法會度話外界認為襲擊事件與新聞工作有關，當局理解，並一直是警方的重要調查方向。CP昨日出席南區區議會會議，繼續被多名區議員質疑，最後佢亦唯有澄清，警方或他本人從來沒排除任何可能性咁話。
CP當日為何在記者會這樣說，至今仍是一個謎。不過有了解警隊高層想法的人士，卻道出了警方的難言之隱。
佢話劉進圖遇襲後，各方哄動，力促警方盡快破案，經常有人指控過去多宗傳媒人遇襲案，無一破案，令警方承受巨大壓力。但警方前線調查人員亦有怨言，話過去至少有兩宗傳媒人遇襲案，已將刀手拘捕，但受害人認人時，卻有意不把刀手認出來，最後不要說揪出幕後主腦，即使刀手也無法入罪，令調查人員極為沮喪。
佢話若要查出真兇，當事人或其他相關的知情人士，要和警方高度合作，將可能的疑人透露出來，警方才有可能查出真相。所以CP這樣說，既為前線人員說話，更希望激發所有知情者提出有助調查的證據。他不著眼政治，只想盡一切可能破案。
Ariel
** 博客文章文責自負,不代表本公司立場 **
金管局陳總終獲續約5年，之後傳過的風風雨雨，都成過眼雲煙。Ariel睇公布他續約的新聞稿，特別留意是以後薪金如何定奪，似乎經過財爺和陳總細意斟酌。
陳總現時合約基本人工600萬沒有每年調整，但有類似花紅的浮薪，加幅無上限。新合約首年基本年薪650萬元，惟往後每年調整不能高於通脹率，新合約首次為浮薪設定260萬元上限，不能超額。
Ariel係打工仔，見到陳總呢個打工皇帝啲人工露晒出來，自然好想同佢計計數，表面睇新合約基本年薪變作可調整，好過舊時。但睇真啲浮薪那部份本來可以大升，而家封晒頂，無乜So。睇往績陳總2011年浮薪升幅高達36%，增至203.8萬元，2012年浮動薪酬再按年大增20.5%，至245.6萬元，年年大升。但未來五年浮薪上限260萬元，估計佢2013年浮薪升幅約5.9%至260萬，之後就能減不能加，即係浮薪無得再加。佢變相成為一個差不多按通脹加人工的高級打工仔，無得再食大茶飯啦。新合約首年基本人工650萬加浮薪上限最多260萬，即係有 910萬現金收入，有少無多啦。佢應該呢世都唔會追到前任總裁任志剛2008年時攞的1,193萬元年薪啦（除非出現超級通脹啦）。
我仲問吓消息人士，陳總基本年薪按通脹調整，咁通縮時點計？消息人士話香港未來出現通縮的機會唔高，但萬一出現時，斷估按陳總合約係可以跟通縮減薪咁話。
結論係陳總差不多變成定薪制，雖然在環球央行行長中佢人工仍然算高，但係就一定比不上新加坡央行行長啦。不過如今社會早已進入批評聲音高漲的時代，陳總人工無咁多，都無咁大壓力啦，食少多覺瞓呀。
