雖然2017年特首點選都唔知，但係啲馬仔已經亂咁跑，好似上週六政府搞的政改論壇，政改三人組之首林鄭本來係正印主角，點知阿松出來做講者太風騷，有少少搶鏡feel。唔知係唔係咁樣搞到林鄭有少少心不在焉，總結出一句「一錘定音」，搞到俾人起勢將軍。
睇目前形勢，特首CY非常想再跑第二屆，佢攞住政府條水喉係咁四圍射，射射吓俾佢企番定。特區冧巴吐林鄭，唔係黑馬，直頭係熱馬，亦係最有實力的挑戰者，不過佢而家搞緊政改，被視為阿爺俾佢的「考牌試」，所以有啲戰戰競競，好似唔係幾得閒舞龍舞鳯，無阿松咁風騷。
不過阿松可能亦只係表面風光，佢都係聰明仔，知道咁早出來跑有風險，但係CY和林鄭個勢都幾強，仲唔出來浦頭，無人覺得佢想玩的話，可能根本就唔預佢啦。
今日田少上電台，被問到會否支持阿松參選特首，田少就亮劍，話阿松與美國財團關係密切，中央對他的信任是大問題。
話時話呢吓叫做明督，講到阿松好似美國間諜咁款，不過阿松即使明知跑先死先，遍地玻璃碎，都會頂硬上架啦。
Ariel
** 博客文章文責自負,不代表本公司立場 **
馮煒光去咗做新聞統籌專員，空咗個南區區議會海怡西選區出來，昨日補選新民黨陳家珮大勝，但排第二得票的人民力量袁彌明好似開心過第一嗰個，相對地民主黨單仲楷排第三，承認係意料之外的慘敗。
三個人得票係咁，新民黨陳家珮得2,023票當選，彌明BB得1,083票，單雞只得920票。睇番2011年上次同區選舉的得票可以作參考，當時馮煒光得1906票，以12票之差險勝排第二的新民黨的施俊輝，佢得1894票，人民力量林雨陽得182票，獨立季詩傑得42票。
第一個問題係點解新民黨咁勁? 其實上次新民黨都只係差12票輸俾馮煒光，所以佢地從來在呢區都有實力。另外你玩吓數學，再計一計，彌明BB和單雞兩個泛民加埋有2003票，比陳家珮少20票，若不是泛民內鬥，鹿死誰手未知。
第二個問題係點解單雞老貓燒鬚? 彌明BB同上次人力林雨陽得票比的確係大躍進。彌明BB好興奮咁話非常滿意結果，仲話自己係進步民主派，單雞係溫和投降民主派，選民選擇咗佢地咁話。
Ariel就話牌面睇彌明BB咁省鏡，單雞選唔贏本來都唔使自卑，係正常賽果啦。但另有一個無乜人留意的角度，個位本來係馮專員的，佢啲鐵票俾咗邊個呢?
斷估無痛苦，馮專員即使愛美女，都無咁大膽俾票彌明BB。但唔好以為佢出身民主黨，就會過票俾單雞。屢傳馮專員同民主黨高層不和，覺得個黨無比機會佢，會唔會無出力過票俾民主黨呢，而且佢入咗政府做，大條道理保持中立，各不相幫。
今次新民黨候選人比2011年選舉只多了129票，佢地啲票應該係自己票。民主派自由博擊，結果單雞就不敵美女了。馮專員就澄清佢無過票俾新民黨，總之保持中立。
