鐵頭仁去上海洗底？

全體立法會議員上海之行，會有半日同中央港澳工作三巨頭交流，王光亞、李飛，當然仲有中聯辦的曉明哥，齊齊傾吓政改，牌就開出咗出來，泛民就要求三巨頭單獨佢哋傾，CY同做團長的曾主席，就形容中央已知悉泛民有關的要求，呢固答法真係有啲玄。

 

Ariel就聽政府中人形容，單獨見的問題應該不大，但計來計去，今次泛民估計最後成行的有十幾人。

 

公民黨比較齊腳，湯家驊、郭榮鏗外，梁家傑都可能去，民主黨卿姐企得好硬，點都唔去，二線的胡志偉做膽，黃碧雲應該會去，講吓講吓，前主席鐵頭仁又話可能會去，咁就頭痕喇，有高人就估計，仁哥上回喺立法會睇性感女郎兼詞興大發，令佢形象大跌，今次敢闖上海，可能想同阿爺開波，希望攞番少少分洗吓底。

 

總之泛民扭扭擰擰，成壇嘢搞到有啲爛爛哋咁，不過，有接觸點都好過唔接觸啩。

Ariel

** 博客文章文責自負,不代表本公司立場 **

雖然2017年特首點選都唔知，但係啲馬仔已經亂咁跑，好似上週六政府搞的政改論壇，政改三人組之首林鄭本來係正印主角，點知阿松出來做講者太風騷，有少少搶鏡feel。唔知係唔係咁樣搞到林鄭有少少心不在焉，總結出一句「一錘定音」，搞到俾人起勢將軍。

睇目前形勢，特首CY非常想再跑第二屆，佢攞住政府條水喉係咁四圍射，射射吓俾佢企番定。特區冧巴吐林鄭，唔係黑馬，直頭係熱馬，亦係最有實力的挑戰者，不過佢而家搞緊政改，被視為阿爺俾佢的「考牌試」，所以有啲戰戰競競，好似唔係幾得閒舞龍舞鳯，無阿松咁風騷。

不過阿松可能亦只係表面風光，佢都係聰明仔，知道咁早出來跑有風險，但係CY和林鄭個勢都幾強，仲唔出來浦頭，無人覺得佢想玩的話，可能根本就唔預佢啦。

今日田少上電台，被問到會否支持阿松參選特首，田少就亮劍，話阿松與美國財團關係密切，中央對他的信任是大問題。

話時話呢吓叫做明督，講到阿松好似美國間諜咁款，不過阿松即使明知跑先死先，遍地玻璃碎，都會頂硬上架啦。