歌手李幸倪（Gin Lee）現身新城廣播接受黎莉主持《勁爆樂勢力》錄音訪問，宣傳兩首新歌，包括由師兄謝霆鋒作曲兼監製的《白夜行》，另一首則是與師弟Daze in White合作的《Wonderful Life in Motion》；Gin透露向霆鋒邀歌時發生了一段小插曲，又大爆霆鋒在開演唱會前仍親自到錄音室監督，令她十分感動。
新歌《Wonderful Life in Motion》由Daze in White編曲，Gin形容是一首很陽光及熱血的歌曲，而且選歌過程相當果斷，她表示：「監製謝國維畀我聽三首Demo，我聽一次就選中呢首，最開心係同成班師弟一齊拍MV，因為咁長時間一齊做嘢係第一次。」不過Gin自爆在戶外拍攝MV當天令她感到有點尷尬，她解釋：「因為首歌未出街，我哋唔想咁快曝光，就細細聲咁唱，但途人見到我哋好high，一定覺得好奇怪，所以有少少尷尬。」問她心目中「Wonderful Life」的定義？Gin以「平衡」與「圓滿」概括，強調人生各領域的和諧比單一成就更重要。
Gin Lee接受黎莉《勁爆樂勢力》節目訪問
Gin透露向霆鋒邀歌過程充滿戲劇性：「本來我收到風霆鋒籌備緊一部電影，睇吓有冇一個小角色可以畀我演，聽講有個角色係金頭髮，仲唔係我？不過暫時未有消息。」沒想到「討角色」意外促成這次音樂合作，Gin膽粗粗透過經理人向霆鋒邀歌，最後成功獲得霆鋒「加持」。
Gin表示：「霆鋒叫我畀三個關鍵字佢，我畀咗奔放同無拘無束，但第三個真係諗唔到，後來見到佢真人，佢話我諗極都試唔到，應該好糾結，所以第三個關鍵字就係糾結。霆鋒仲話聽咗我好多歌，試過好多唔同風格，佢想透過呢首歌展現我嘅實力，同埋釋放自己潛能。」
Gin透露向霆鋒邀歌過程充滿戲劇性
而《白夜行》這首歌錄到第三天，正忙於籌備演唱會的霆鋒突然現身錄音室，Gin說：「佢可能重視呢首歌仲多過自己嘅歌，因為佢開演唱會前12日仲嚟同我錄音，自己綵排都冇去，我真係好感動。」Gin又指同是處女座的霆鋒凡事都精益求精，她表示：「本來首歌錄好咗，但佢話唔得，可以再好啲，所以第三日佢嚟咗。」
為呈現《白夜行》的遼闊意境，團隊遠赴雲南拍攝MV，MV中Gin身穿拖地長裙在真實火堆間穿梭，更需在洞穴中爆發歇斯底里的演技，她憶述：「導演提出『浴火重生』概念時，我第一個反應係要求公司買保險，因為有一刻好驚，好驚裙尾會燒著！」
Gin又指同是處女座的霆鋒凡事都精益求精
