Gin Lee新歌韓流班底壓陣錄得超快嚇親猛人監製

娛圈事

Gin Lee新歌韓流班底壓陣錄得超快嚇親猛人監製

2025年12月31日 10:30 最後更新：12:02

日前於樂壇派發的第一張成績表中大豐收的Gin Lee李幸倪，推出全新跳唱作品《ICONIC》，歌曲除了是全新作品，更是Gin出年二月殺入紅館的演唱會主題曲，未開騷已經率先為個唱熱身。這次新歌由韓國Kpop猛人操刀，找來王嘉爾（Jackson Wang）的御用監製Boytoy作曲兼監製，將Gin Lee的舞台爆炸力再推高幾級。

點擊看圖輯

Gin Lee推出全新跳唱作品《ICONIC》。

Gin Lee

觀看相關影片按連結：https://youtu.be/m-KFfFsxfac?list=RDm-KFfFsxfac

Gin指這次錄音過程是自己的一次大爆發，「第一次喺韓國錄音，上一次《Dum Dum》同Boytoy係隔空合作，今次可以親身嚟同佢一齊錄音。我冇一個概念，唔知道喺韓國錄音係一個點樣嘅情況，所以係同大家一齊適應呢個雞同鴨講嘅環節，期待又緊張嘅。」除此之外，Gin坦言今次錄音最大難關是廣東話！「因為首歌唔係用廣東話思維去寫，林寶已經寫得好好，但要將所有廣東字聲調擺入個旋律度，真係要花啲心機。」

廣東話的歌詞中，亦加上了一段英文歌詞，Gin笑說自己女團魂出沒，「變女團呀我而家，好似18歲啦啦隊嗰種感覺，我平時聽開K-pop同Beyoncé都有呢種元素。呢首算係我第一首咁風格嘅歌，幾正㗎，大家可以見到我另外一面。」監製Boytoy亦大讚Gin錄音神速，「錄得超級快，有嚇到！」Gin聽到後亦不客氣笑住認威，「我為港增光呀！飛到咁遠，唔使四個鐘搞掂！其實錄到後段已經喺度搵嘢做，哈哈！」

歌曲除了是Gin跟歌迷之間的熱身密碼，同時亦是鼓勵大家卸下糖衣包袱，將自己最真、最閃耀的一面盡情爆發。Gin一向柔情又得、火爆亦得，今次便徹底釋放她力量型的唱功，一開聲已經似集結號，準備帶樂迷進入戰鬥狀態。填詞人林寶一句「Watch me now, I’m iconic」，將Gin的自信跟霸氣寫到入骨。

往下看更多文章

Gin Lee李幸倪紅館騷尾場真情剖白炎明熹做嘉賓「師徒」互爆唔鍾意比賽

Gin Lee李幸倪《READY FOR GIN LEE 李幸倪 LIVE IN CONCERT HONG KONG 2026》演唱會昨晚（2月8日）圓滿落幕。尾場氣氛超High，Gin除了施展渾身解數大唱Hit歌，又於台上真情大剖白，大談入行辛酸史及內心世界，大爆自己為了適應娛樂圈，曾特意買書學如何跟陌生人打開話題，認真又搞笑。

演唱會播出Gin內心世界訪問短片，她坦言最怕不被理解，慨嘆現在做歌手難，但女藝人更難，「女artist通常都好瘦、underweight，我最瘦嘅時候瘦過而家差唔多七公斤，我坐唔到櫈，一坐pat pat就會痛，因為直接哽到pat pat嗰兩嚿骨。」她強調不想這樣過，現在開心做回自己，很健康，還自嘲：「咁我而家又唔肥，係咪先？只不過比一個紙皮人係肥咗啲啫！」對於網上留言叫她「瘦多十磅」，Gin就瀟灑回應：「多謝，但係我好開心做自己！」引來全場掌聲。

演唱會上，Gin跟歌迷有不少互動，有歌迷舉起自製大紙牌，寫着「對我講黐線」，Gin睇到一頭霧水，「你寫咩啊？『對我講黐線？』黐線！哈哈，點解要講黐線啊？」笑翻全場；另一歌迷就舉牌要求「唔唱幸福門唔返屋企！」，Gin即時O嘴：「咁大鑊？」

尾場嘉賓，Gin請來她於《聲夢傳奇》的冠軍學員炎明熹（Gigi）。這對「冠軍師徒」的對話充滿笑點。Gin指自己跟Gigi十分相似，所以會彼此傾心事，又謂兩人都不喜歡比賽，Gigi細細聲說：「係。」觀眾即時大笑，然後續說：「我係非常之唔鍾意比賽，大家知唔知點解？其實係因為我係一個好Hea嘅人！」全場又再次爆笑。Gin聞言即笑問：「你係咪對自己有啲誤解？我一路都唔覺得你係好Hea喎！」Gigi則解釋：「因為比賽冇得Hea，哈哈，所以就遇到你囉！」Gin笑言：「我鞭策你係咪？」隨後兩人合唱《一加一》，Gigi再獨唱自己歌曲《風旅》。

演唱會尾聲，Gin一口氣唱出歌迷瘋狂點唱的《虛榮》及《幸福門》，前奏一響起歌迷即瘋狂尖叫；《企好》則開啟全場大合唱模式，氣氛熾熱。第二次Encore唱完《今天終於一人回家》後，Gin落台，但歌迷依然不肯離去，不斷嗌Encore，最後Gin再度出場，應歌迷要求唱出《雙雙》，為演唱會畫上完美句號。

昨晚場面星光熠熠，來捧場的圈中好友包括霍汶希（Mani）、關智斌（Kenny）、泳兒（Vincy）、周國賢（Endy）、楊天宇（Angus）、李靖筠（Gladys）、MIRROR成員Anson Lo及Jeremy、ERROR成員肥仔、COLLAR成員Gao、Marf及Winka、YT周殷廷、陳凱詠（Jace）、樂隊Locksmiths開鎖佬成員Harry、大雄、Eric同Tom、馬浚偉及力臻等。

你或有興趣的文章

Gin Lee新歌韓流班底壓陣錄得超快嚇親猛人監製

娛圈事