小心男人

有不少網友叫我多寫人生上位的故事，讓他們學學嘢。陸羽仁聽到故仔多到數唔晒，有上位的，也有落位的，可以分享很多故事。

這個故仔是在一間大公司發生，由於想保護當事人，所以人名及細節並非事實，但關鍵情節寫實。呢間公司Marketing阿頭Louis，人事加監察部阿頭Linda，兩個都係洋人。Linda兼監察各部門開支的職能，為人幹練，自稱做嘢咁耐從未犯錯。Louis人緣不俗，但為人有點古惑。Linda下屬Sian經常報告Louis部門有啲古靈精怪嘢，那裏出問題說不清，但總覺得有啲唔妥。

不過Louis同Linda由唔同部門眼超超，變得愈行愈埋。有一次好多同事一齊出埠公幹，Sian發現老細Linda借啲意話唔喜歡A酒店，就丟低同一部門的同事，去咗住B酒店，Sian後來同Marketing的同事傾起，發現佢地阿頭Louis又係自己住咗B酒店，就發覺有啲唔對路啦，不過佢諗Linda同Louis都結咗婚，唔會有嘢啩。

女人的直覺好強，Sian愈睇愈覺得唔妥，試過有一次同佢地兩個一齊開會，暗中拋枝筆落地下，執筆的時候睇吓枱底會唔會發現有兩隻腳交疊在一起，結果雖然無發現，但佢疑心不止。因為Sian過去一發覺Louis部門有乜問題，報俾老細Linda聽，Linda都會落力查。而家再報告Linda，佢就愛理不理，甚至叫Sian唔好咁多事。久而久之，Sian同老細Linda都搞到面左左。

火山終於爆發，有一次三個人一齊開會，Sian覺得Marketing有單推廣活動採購贈品的價錢好有問題，在會上提出，Linda幫埋Louis，話唔覺得單嘢有問題，Sian氣上心頭，爆咗句:「唔知你兩位係唔係在床上傾掂晒!」講到咁，自然無好下場，Linda逼Sian辭工。Sian返咗祖家後，愈諗條氣愈唔順，向總公司投訴，總公司專門派人嚟香港查，就查到Louis原來有私幫生意，在外面開公司，賣貨俾自己部門，做到風生水起。公司高層震怒，Louis同Linda兩個人都炒晒。

呢個世界唔使等患難都見到真情。兩人被炒後，Louis即飛Linda，原來Louis呢個古惑仔，明知自己咁搞，Linda的部門遲早查到，就去上咗Linda，做自己的保護傘。呢段「情」，只係建基在實利基礎上。

最慘的是Linda，本來係正經人，被炒出來，個名在行內臭咗，兩三年都搵唔番工。但Louis出去就打正旗號做老闆，啋你都傻。千祈唔好信善有善報、惡有惡報呢啲「民間傳奇」式的信念，現實上壞人唔一定有惡報。

 

宮心計唔係女人的專利，宮心計的男人大有人在。職場險惡，你唔搵公司水，有人會搵公司笨，你老實，人地就當你老襯。先唔好諗向上爬，起碼唔好向下跌呀。

陸羽仁

** 博客文章文責自負,不代表本公司立場 **

世界杯完咗，但係有關世界杯賭波的話題講唔完。豐盛金融資產管理董事黃國英對傳媒話，在德國同阿根廷的決賽中，佢以值博率高為由，落注阿根廷，結果當然輸錢。

其實黃國英都係睇德國最有機會奪冠，但覺得捧德國嘅氣氛太一面倒，加上買阿根廷嘅賠率唔錯，反而值得博一博，結果博輸咗。

我地慣咗以成敗論英雄，覺得黃國英輸咗就係輸咗。但場波阿根廷在加時尾段先至失波，德國只係險勝，若然賠率一面倒倒向德國，買阿根廷自然有理由。

美國電視會轉播德州撲克錦標賽，在2009年一場電視轉播的賽事中，兩個世界冠軍級的玩家對陣，杜旺(Tom Dwan)對艾維(Phil Ivey)，在轉播中觀眾可以看到所有人的牌。兩人對賭加注到超過100萬美元彩池，艾維攞到牌組成一條蛇(最高5點)，蛇已是很強的牌了。但不幸地杜旺最後一刻攞牌竟然也組成一條蛇，而且最高是7點，比艾維的牌大，杜旺是在極少可能下拿到這張幸運牌。艾維要決定跟不跟注。

看直播的主持和觀眾都知兩人的底牌，其中一位主持話:「要是有人能逃脫這種困局，就是艾維了。」意思是如果艾維叻到識棄牌不跟，就是有極高的打牌技巧了。結果艾維跟注輸錢，實情是如果他棄牌，才是最屎的打法。按當時的情勢及枱面有的牌，艾維估計自己至少有90%機會可以贏杜旺，如果他選擇棄牌不跟，他就打得太差了。

這個例子說明，在有技巧的賭博或投機遊戲中，要計算機率和賠率，在機率和賠率有利時下注。雖然這樣做在一局中未必會贏(如上述德州撲克的賭局就出現罕見的例外情況，杜旺咁好運抽到好牌取勝)，但不必太注重短期的成敗，賭上1000局、1萬局時，還是以合理的、科學的方法下注的人可以勝出。過程正確，長賭會贏。