有不少網友叫我多寫人生上位的故事,讓他們學學嘢。陸羽仁聽到故仔多到數唔晒,有上位的,也有落位的,可以分享很多故事。
這個故仔是在一間大公司發生,由於想保護當事人,所以人名及細節並非事實,但關鍵情節寫實。呢間公司Marketing阿頭Louis,人事加監察部阿頭Linda,兩個都係洋人。Linda兼監察各部門開支的職能,為人幹練,自稱做嘢咁耐從未犯錯。Louis人緣不俗,但為人有點古惑。Linda下屬Sian經常報告Louis部門有啲古靈精怪嘢,那裏出問題說不清,但總覺得有啲唔妥。
不過Louis同Linda由唔同部門眼超超,變得愈行愈埋。有一次好多同事一齊出埠公幹,Sian發現老細Linda借啲意話唔喜歡A酒店,就丟低同一部門的同事,去咗住B酒店,Sian後來同Marketing的同事傾起,發現佢地阿頭Louis又係自己住咗B酒店,就發覺有啲唔對路啦,不過佢諗Linda同Louis都結咗婚,唔會有嘢啩。
女人的直覺好強,Sian愈睇愈覺得唔妥,試過有一次同佢地兩個一齊開會,暗中拋枝筆落地下,執筆的時候睇吓枱底會唔會發現有兩隻腳交疊在一起,結果雖然無發現,但佢疑心不止。因為Sian過去一發覺Louis部門有乜問題,報俾老細Linda聽,Linda都會落力查。而家再報告Linda,佢就愛理不理,甚至叫Sian唔好咁多事。久而久之,Sian同老細Linda都搞到面左左。
火山終於爆發,有一次三個人一齊開會,Sian覺得Marketing有單推廣活動採購贈品的價錢好有問題,在會上提出,Linda幫埋Louis,話唔覺得單嘢有問題,Sian氣上心頭,爆咗句:「唔知你兩位係唔係在床上傾掂晒!」講到咁,自然無好下場,Linda逼Sian辭工。Sian返咗祖家後,愈諗條氣愈唔順,向總公司投訴,總公司專門派人嚟香港查,就查到Louis原來有私幫生意,在外面開公司,賣貨俾自己部門,做到風生水起。公司高層震怒,Louis同Linda兩個人都炒晒。
呢個世界唔使等患難都見到真情。兩人被炒後,Louis即飛Linda,原來Louis呢個古惑仔,明知自己咁搞,Linda的部門遲早查到,就去上咗Linda,做自己的保護傘。呢段「情」,只係建基在實利基礎上。
最慘的是Linda,本來係正經人,被炒出來,個名在行內臭咗,兩三年都搵唔番工。但Louis出去就打正旗號做老闆,啋你都傻。千祈唔好信善有善報、惡有惡報呢啲「民間傳奇」式的信念,現實上壞人唔一定有惡報。
宮心計唔係女人的專利,宮心計的男人大有人在。職場險惡,你唔搵公司水,有人會搵公司笨,你老實,人地就當你老襯。先唔好諗向上爬,起碼唔好向下跌呀。
陸羽仁
** 博客文章文責自負,不代表本公司立場 **