港元拆息連續兩日全線上升，其中1個月拆息（Hibor)創近11年新高，升至2.62厘，較美元1個月拆息（Libor)2.42厘拆息高出20個基點。
港元1個月Hibor拆息上升至11年高位。金管局圖片
自從近月中美貿易戰惡化以來，特朗普已多次催促美國聯儲局減息，最近一次聯儲局會議中，鮑威爾主席亦表態轉鴿，市場憧憬今年下半年美國有機會減一至兩次息，所以其實近月美息已經開始回落，由年初2.51厘徐徐下跌至現在的2.42厘。
圖片：美元1個月Libor拆息由年初2.51厘徐徐下跌至2.42厘。
睇返今年1月，當時美元1個月Libor 是2.51厘，港元1個月Hibor是2.03厘，息差48點子，好多人會做套息交易，沽港元買美元賺取息差。由於美息徐徐回落，消化即將減息的因素， 美元1個月Libor 同港元1個月Hibor嘅息差相距，已經由年初48點子，一直收窄，令沽港元買美元的短期套息交易，漸漸變得無肉食，紛紛平倉計數。
近日港息繼續抽上，竟然升到比美息還高，出現倒掛現象，究竟是什麼原因？有人擔心近日因為修訂逃犯條例觸發的示威及警民衝突，令投資者對香港失去信心，是否有很多資金由香港流走，令市場水緊，將港息抽高呢？
尚風同中環銀行界庫務人士傾過，佢話睇資金有無流走，其實唔單只睇利息，亦都要睇匯價，近日港元轉強，1美元兌港元已經由5月底的7.85跌到去7.825水平，如果有資金流走，應該係沽出港元買入美元，然後調走啲美金，咁樣港元應該係弱先啱。其實港元轉強，應該有另外一個比較重要嘅因素，就係6月同埋7月份係香港股票嘅派息高峰期，好多公司要買入港元，準備派息俾股東。
港元匯價近日升至7.825水平。CNBC圖片
尚風馬上做了個簡單嘅估算，現時香港股票市場市值大約30萬億港元， 假設只有三份一嘅公司派息，今次派息兩厘或2%，香港嘅上市公司就需要準備大約2000億港元嘅資金來派息畀股東。相比香港貨幣供應M1嘅24,800億港元，2000億港元嘅外匯買盤，足以抽高短期息口。況且，即使港元一個月拆息升至2.62厘水平，其實相比2000年的8厘及2007年時的7厘水平，仍然不高。
尚風
** 博客文章文責自負,不代表本公司立場 **