隔晚美股半日市，準備慶祝美國獨立日，杜指、納指及標普500指數竟然可以同創出歷史新高！
今日周圍上網睇下啲財經評論員有乜嘢講，結果都係冇乜特別，淨係話美國6月個ADP職位新增比預期少咗四萬個左右，咁美國七月減息機會好高，加上通脹可控維持在低於2%，在低息及低通脹環境下，令資金更願意流入股市追求高回報，睇完呢啲咁嘅評論，真係睇咗等於冇睇，新增職位少即係代表經濟唔好，所以要減息，經濟如果唔好，股市都應該唔會好。
不過，有評論員就話，我哋開始要將股價同埋企業盈利及經濟基本因素decouple, 即係分開來睇，宜家個市流動性高、息口低，資金嘅推動先係王道，先至係主宰股市嘅走勢。呢啲咁嘅評論背後有時真係覺得幾好笑，推翻晒我哋課本嘅理論，如果公司盈利同埋經濟前景唔係支持股價上升嘅主要原因，咁單單靠資金流動來推動股市，呢啲咁嘅升市可以維持到幾耐？咁股神畢菲特都可以收工啦。
不過，算啦，聽慣咗美國佬吹水唔駛本，對於呢啲評論亦都一笑置之。相對來講，香港嘅股市就比較理性，今日升到29,000點已經冇力，加上成交又由千億元縮到得番700億元，觀望氣氛好濃厚，嗰市暫時真係唔夠力再向上衝。
中環人今日happy hour, 冇乜點講股市，講嘅都係主要談論啲異動股，好似炒到癲嘅半新股中煙香港（6055），明明係代阿媽買煙葉，過手時賺少少嘅代理公司，估值唔會高得去邊，上升潛力有限，兩個禮拜前以招股價4.88元上市，尋日竟然可以炒到上28蚊，估值去到74倍PE，然後就急速下跌，今日收市得返13.78元，股價好似坐過山車咁，比高位無咗一半，好有派貨味道，如果有散戶忍唔住喺高位追入，真係損失慘重。
近日中環人嘅熱門話題，就係講叻哥陳百祥太座秀姑用千六蚊贏六百萬，呢個故事對馬迷來講，係相當勵志同鼓舞，原來只要有恆心，努力去鑽研賽馬，以小博大，要掘馬會草皮唔係冇可能嘅。
另外，今日亦睇到新聞，香港唯一在美國女子職業高爾夫球巡迴賽LPGA比賽嘅土產球員陳芷澄（Tiffany Chan)有突破性嘅成績，啱啱喺美國其中一站賽事攞到第13名，在芸芸世界級高手中，攞到咁嘅成績真係唔容易。
所以我哋係人生路上，如果遇到不如意嘅事，好似輸波輸馬輸股票，千祈唔好氣餒，老友們碰完杯暢完飲，返屋企瞓返一場好覺，明天努力做好基本功，又有新嘅希望。
高球美少女陳芷澄在美國LPGA女子職業巡迴賽成績有突破。香港高爾夫球會圖片
尚風
** 博客文章文責自負,不代表本公司立場 **
商台人生交叉盤20周年，陸叔訪問馬時亨下集，談到中美貿易戰：
時亨哥認為，中美根本不是在打貿易戰，他從一些美國政客及高官中瞭解，美國是想Contain(包圍)中國! 打貿易戰只是一個藉口，防止中國超越美國，這才是重點，而香港是中國的一部份，難免成為美國焦點，香港將會受到相當程度的影響，現時中國經濟增長每年已跌至6.2%水平，美國本身亦受傷害。由於香港經濟與內地息息相關，難免受影響，香港最重要是保住特殊關稅的地位，呢方面要睇得好緊。
時亨哥又指出，相信香港嘅樓市同股市也會受影響，本身不是太樂觀，自己已經好耐無增持股票，反而會趁反彈沽貨，至於地產方面，一年多前已經開始減磅，美國利息雖然低，但係金融市場風險一啲都唔低。
被問及近期有地產商高銀撻訂，放棄買入啟德商業用地，時亨哥認為，個別地產商的行動不一定作準，相信大地產商會自己計掂數，唔會受個別公司嘅行動影響。睇返97同埋98年嘅時候， 97年7月泰國及印尼先後有金融風暴，當時香港嘅樓價同股票仲係好高，到10月時候開始股樓齊跌，當時有大地產商開始擔心，結果到98年中便真的出現大範圍撻訂事件，所以今次有無延後嘅影響，真係好難講，「都係建議大家喺投資方面，做好分散風險，特別我哋年紀唔細，做好資產分佈（asset allocation) 好重要。」
他談到46年前佢同陸叔一齊響香港大學畢業時，香港係「爭氣之都」，當時畢業只會想搵一份好工，跟住做好份工，然後望升職加薪，望自己可以有能力租屋住，當時返工亦是坐冇冷氣嘅熱狗巴士，又或者是搭11號行路，根本冇諗過可以好快買樓買車。
對比宜家，香港變咗一個「怨氣之都」，時亨哥好明白點解會搞成咁，佢畢業嘅時候第一份工千六蚊一個月，當時一碟碟頭飯1.2元 ，啲樓200蚊一呎，依家啲樓二萬蚊一呎，飯盒幾十蚊一個，兩樣嘢都係升咗幾十倍，但係啲大學生畢業嘅人工都係萬零蚊，只係升左10倍，咁年青人咪覺得自己冇辦法往上流，置業無望，咁咪累積咗好多怨氣囉，當然亦都有唔少年青人係好努力，靠實力去打拼，可以搵到幾好嘅職位，同埋上到車。
咁政府可以點做呢？其實他昨日都提到，香港嘅經濟發展，未來一定要增加一啲高增值嘅產業，增加就業機會，令年青人嘅收入可以增加。香港有一個好大嘅優勢就係有一流嘅大學，可以培養世界級嘅人才，呢啲人才可以為香港將來嘅發展貢獻良多。
佢認為大灣區係一個非常有利嘅政策，以前講咗泛珠三角概念好耐，但係當時未受國家高度重視，但今時唔同往日，大灣區係國家級嘅高層次嘅發展，受高度重視。香港只係得700幾萬人口，唔夠力發圍，融合咗大灣區幾千萬人口就唔同。
時亨哥認為，大灣區有三個發展重點，第一係金融，將來私人銀行在呢一區有非常大的潛質去發展，因為有大量國內嘅財富，需要香港嘅人才去管理。第二係醫療保健，幾千萬嘅人口，加上人口老化，係未來大灣區一個發展潛力非常高嘅行業。第三係科技，大家知唔知道深圳南山區現時嘅人均收入已經升到52000美金一年，人家10幾年前才發力，已經有重大成果，相反香港停滯不前，响呢方面大大落後。香港應該好好利用今次機會，發展一啲可以紮根香港嘅高增值產業，融合大灣區，創造另一個高峰。
大灣區發展規劃 , 資料圖片
