馬時亨：中美根本不是在打貿易戰 而是美國要Contain中國

商台人生交叉盤20周年，陸叔訪問馬時亨下集，談到中美貿易戰：

時亨哥認為，中美根本不是在打貿易戰，他從一些美國政客及高官中瞭解，美國是想Contain(包圍)中國! 打貿易戰只是一個藉口，防止中國超越美國，這才是重點，而香港是中國的一部份，難免成為美國焦點，香港將會受到相當程度的影響，現時中國經濟增長每年已跌至6.2%水平，美國本身亦受傷害。由於香港經濟與內地息息相關，難免受影響，香港最重要是保住特殊關稅的地位，呢方面要睇得好緊。

時亨哥又指出，相信香港嘅樓市同股市也會受影響，本身不是太樂觀，自己已經好耐無增持股票，反而會趁反彈沽貨，至於地產方面，一年多前已經開始減磅，美國利息雖然低，但係金融市場風險一啲都唔低。

被問及近期有地產商高銀撻訂，放棄買入啟德商業用地，時亨哥認為，個別地產商的行動不一定作準，相信大地產商會自己計掂數，唔會受個別公司嘅行動影響。睇返97同埋98年嘅時候， 97年7月泰國及印尼先後有金融風暴，當時香港嘅樓價同股票仲係好高，到10月時候開始股樓齊跌，當時有大地產商開始擔心，結果到98年中便真的出現大範圍撻訂事件，所以今次有無延後嘅影響，真係好難講，「都係建議大家喺投資方面，做好分散風險，特別我哋年紀唔細，做好資產分佈（asset allocation) 好重要。」

他談到46年前佢同陸叔一齊響香港大學畢業時，香港係「爭氣之都」，當時畢業只會想搵一份好工，跟住做好份工，然後望升職加薪，望自己可以有能力租屋住，當時返工亦是坐冇冷氣嘅熱狗巴士，又或者是搭11號行路，根本冇諗過可以好快買樓買車。

對比宜家，香港變咗一個「怨氣之都」，時亨哥好明白點解會搞成咁，佢畢業嘅時候第一份工千六蚊一個月，當時一碟碟頭飯1.2元 ，啲樓200蚊一呎，依家啲樓二萬蚊一呎，飯盒幾十蚊一個，兩樣嘢都係升咗幾十倍，但係啲大學生畢業嘅人工都係萬零蚊，只係升左10倍，咁年青人咪覺得自己冇辦法往上流，置業無望，咁咪累積咗好多怨氣囉，當然亦都有唔少年青人係好努力，靠實力去打拼，可以搵到幾好嘅職位，同埋上到車。

咁政府可以點做呢？其實他昨日都提到，香港嘅經濟發展，未來一定要增加一啲高增值嘅產業，增加就業機會，令年青人嘅收入可以增加。香港有一個好大嘅優勢就係有一流嘅大學，可以培養世界級嘅人才，呢啲人才可以為香港將來嘅發展貢獻良多。

佢認為大灣區係一個非常有利嘅政策，以前講咗泛珠三角概念好耐，但係當時未受國家高度重視，但今時唔同往日，大灣區係國家級嘅高層次嘅發展，受高度重視。香港只係得700幾萬人口，唔夠力發圍，融合咗大灣區幾千萬人口就唔同。

時亨哥認為，大灣區有三個發展重點，第一係金融，將來私人銀行在呢一區有非常大的潛質去發展，因為有大量國內嘅財富，需要香港嘅人才去管理。第二係醫療保健，幾千萬嘅人口，加上人口老化，係未來大灣區一個發展潛力非常高嘅行業。第三係科技，大家知唔知道深圳南山區現時嘅人均收入已經升到52000美金一年，人家10幾年前才發力，已經有重大成果，相反香港停滯不前，响呢方面大大落後。香港應該好好利用今次機會，發展一啲可以紮根香港嘅高增值產業，融合大灣區，創造另一個高峰。

大灣區發展規劃 , 資料圖片

尚風

** 博客文章文責自負,不代表本公司立場 **

商台人生交叉盤邁向20年，陸叔今日請咗馬時亨做訪問，今日是上集，時亨哥講到做公職的政治治慧，以下是部份內容：

馬時亨首先恭喜陸叔可以做一個長壽節目嘅主持維持20年，非常之唔簡單。陸叔第一句好歡迎亦都好榮幸請到呢個以前香港大學嘅同學來做訪問，亦都好羨慕馬時亨可以享受退休嘅生活，因為佢啱啱卸任港鐵主席一職。

時亨哥表示，過去二十年，香港有好大變化，政治上實行問責制，經濟上，金融中心發展得好好，係集資中心，中國通往世界金融中心嘅窗口，亦都係資產管理中心。由以往主要服務香港公司，轉為服務大量內地公司。

旅遊業方面，自從沙士之後，中國政府幫咗香港好多，香港嘅遊客由以往每年千幾萬增加至每年六千幾萬人次，令香港全民就業。不過，有一點可惜，就係十幾年前，香港冇加大科技創新嘅發展，冇轉型，唔夠多元化。時亨哥08年離開政府，2010年接受當時嘅特首梁振英訪問時提到，點解人口同香港差唔多嘅瑞士，人均收入每年達到8萬美元，而香港現時只係4萬美元？睇返瑞士嘅經濟結構，呢個國家除咗鐘錶業同埋私人銀行資產管理業相當出名之外，佢哋仲有高增值嘅美容化學、食品等領域，都係非常成功，所以要多元化發展，先至可以增加經濟效益。香港依家先想在科技創新領域追近深圳，係慢咗大半拍。

致於有人話國內好多年青人嚟咗香港讀書同埋做嘢，又或者響外國讀完書返嚟嘅海歸派，搶走咗本地年青人嘅飯碗，馬時亨認為，呢個係自由競爭嘅社會，每個人都應該裝備好自己，例如學好英文同埋普通話，自然可以在職場上找到理想嘅工作。

陸叔問馬時亨，人生經歷咗咁多，做過政府公職（財經事務局局長和港鐵主席），又做過私人機構（電訊盈科），究竟有乜嘢分別呢？

馬時亨答，如果唔好彩做錯野嘅話，做政府工同做私人機構好唔同，做政府工，問責制，就算你做啱咗99件事，做咗幾十年政府工好稱職，只要有一件事做得唔好，就會廣受攻擊，所以做政府工嘅時候，成日都要時刻警惕，要好有政治智慧，否則做錯一件事，隨時墮入陷阱，會因此失去民意支持。

馬時亨妙語, 做政府工要有智慧，資料圖片

至於做私人機構，即使你犯錯，但都唔係咁緊要，因為好似蘋果嘅喬布斯咁樣，佢曾經有好多低潮，但係一發明咗iPhone手機之後，就可以令公司盈利大增，起死回生，亦都可以因此而名留青史。

陸叔問，馬時亨現時卸任咗港鐵嘅公職，退休生活之後有乜打算。馬時亨話，其實佢十多年前已經退咗休，港鐵做主席其實係類似一個兼職，但係當人家知道你係主席嘅時候，所有港鐵嘅事就入咗你數，變咗一路都好似無退休咁樣。

馬時亨又講到，佢唔止一次被某些人散播壞消息，造謠去詆毁佢，係人格謀殺，例如去年聖誕節打高爾夫球事件，佢舊年做過手術，已經幾個月無打高球，而且當時根本響澳洲，點可以用張舊相來屈佢呢？初初見到呢啲新聞，佢都非常之唔開心，但係有一個老行尊提醒咗佢，做得公職，做得名人，其實就預咗俾人屈，呢啲就係工作嘅一部分，只要自己問心無愧，自得其樂，呢啲咁嘅謠言自然會不攻自破。

明天還有下集。