政事
最近泛民兩大黨各玩各議題，民主黨玩鉛水，公民黨玩港大，暫時睇民主黨得分較多，公民黨搞到一身蟻。
包圍衝擊港大校委事件甚多劣評，港大學生會都話下次唔再衝擊。公民黨主席余若薇俾人播片追殺，話當日示威者包圍校委麥嘉軒半小時，搞到麥嘉軒面青唇白之時，余若薇在旁睇戲。
港大校委、亞瑟王李國章昨日接受DBC電台訪問時，發功追殺公民黨，他在自己任主席的DBC電台，好似在主場一樣，非常生猛。佢批評有政黨無恥，慫恿學生作出過火行為，他更點名批評公民黨的梁家傑、余若薇及郭家麒，要求他們不要為了明年立法會選舉製造議題，「公民黨可搵其他話題，唔好將教育及大學擺上神主枱」。
余若薇就回應李國章話，「你講2016年9月選舉？政治一日都嫌長，何況明年？我哋講緊係目前，大家恥笑緊佢，所以佢先要轉移視線。」
政壇高人話，公民黨在港大衝撃事件上犯上和佔中一樣的錯誤 ，行動被泛民激進派騎刧，公民黨卻要埋單。
Ariel
** 博客文章文責自負,不代表本公司立場 **
梁家榮出任廣播處長，暫時還是讚賞聲音多一點， 彈者多是重提亞視誤報江澤民死訊的舊事，沒有太多材料攻擊。
新聞界八卦友就留意曾在無綫和榮總共事的議員有何評價。 咁啱兩個泛民女將民主黨劉慧卿和公民黨毛孟靜都曾是無綫前記者， 佢地對榮總評價唔差。
民主黨卿姐話：「梁家榮是謙謙君子， 但我會擔心他很多事情不夠強硬，即不夠堅持。 他來自新聞界是好事，對廣播有認識，但有些事情都要向政府爭取。 我希望他會有這個勇氣堅持新聞自由，採訪、編輯獨立。」
公民黨毛姑姑今早在港台話，佢80年代入無綫做記者， 梁家榮已是編輯枱主任，佢大讚榮總能力好高， 提到當年英國首相戴卓爾夫人開記者會做直播，榮總即時翻譯， 語文能力好高，出鏡又淡定。
主持可能見毛姑姑讚到咁，問番個負面問題平衡吓， 就提到誤報江澤民死訊事件， 毛姑姑雖然話呢件事是榮總生命中的黑豬， 但在亞視呢種紅色電視台好難免，又話獨家新聞的誘惑好難頂， 結果佢都有為事件負責下台。
榮總似乎好受舊同事女記者歡迎，雖然而家都只係蜜月期， 未來有乜事無人知，但總好過鄧忍光未上任就被人鬧啦。
