曾主席否認組智庫在「造王」

立法會主席曾鈺成一直被指有意選特首，佢昨日在港台節目中問，有人呼籲他參選特首，是否已完全了解其優點及缺點，佢形容自己作為選舉動物，傾向掩飾缺點。行年68的曾主席話有自知之明，不論年齡或知識層面都無能力參選特首，直言對經濟及金融的認識是零。

曾主席話特首人選要獲北京信任和市民接受，亦要有能力，佢不忙補充：「做特首係需要民望嘅。」他指香港仍有這種人選。

曾主席自評時對缺點評得相當客觀，但講到民望，佢民望又真係幾高喎。佢唔選會唔會去「造王」呀？曾主席聲言明年立法會退任後會組織智庫，但佢話不是要為任何人爭取民意或「造王」。

不過曾主席呢個「唔造王」的講法有幾真，都要商榷一下。因為有自稱參與曾主席呢檔智庫的人馬話，曾主席唔選特首，但智庫可以造王，佢地打正旗號搞智庫，研究未來政策，甚至培訓從政人才，而且現在就開始埋班，搶先吸納人才，到明年特首選舉開跑，任何人想去選特首，係唔係都要嚟同佢地傾吓點樣合作？

曾主席呢檔嘢唔缺錢，佢早前接受訪問時已講，目前智庫籌款反應不錯：「如一年開支在1,000萬以下，相信不會太艱難」。曾主席認為智庫還需要有一位靈魂人物，「 一個一站出來，大家就熟悉，知道他的理念，是一個可靠的人」， 笑言自己仍符合這些條件。

Ariel

** 博客文章文責自負,不代表本公司立場 **

最近泛民兩大黨各玩各議題，民主黨玩鉛水，公民黨玩港大，暫時睇民主黨得分較多，公民黨搞到一身蟻。

包圍衝擊港大校委事件甚多劣評，港大學生會都話下次唔再衝擊。公民黨主席余若薇俾人播片追殺，話當日示威者包圍校委麥嘉軒半小時，搞到麥嘉軒面青唇白之時，余若薇在旁睇戲。

港大校委、亞瑟王李國章昨日接受DBC電台訪問時，發功追殺公民黨，他在自己任主席的DBC電台，好似在主場一樣，非常生猛。佢批評有政黨無恥，慫恿學生作出過火行為，他更點名批評公民黨的梁家傑、余若薇及郭家麒，要求他們不要為了明年立法會選舉製造議題，「公民黨可搵其他話題，唔好將教育及大學擺上神主枱」。

余若薇就回應李國章話，「你講2016年9月選舉？政治一日都嫌長，何況明年？我哋講緊係目前，大家恥笑緊佢，所以佢先要轉移視線。」

政壇高人話，公民黨在港大衝撃事件上犯上和佔中一樣的錯誤 ，行動被泛民激進派騎刧，公民黨卻要埋單。