政事
新華社早前專訪財爺曾俊華以及特首梁振英， 跟手又發佈金管局總裁陳德霖的專訪，題目是《金融穩定重中之重》，有人仲得閒去計字數，話多過2800字，少過梁振英專訪3600字，但多過鬍鬚曾的2300字。
新華社在訪問中形容人稱「攞命陳」的陳德霖「儒雅」，又話解說如何應對金融動動盪時，數據、理據信手而來。
不過政壇高人講，如果想從這些訪問中，搵到誰是下屆特首的絃外之音，就如算命先生那樣，捉錯用神。唔係話呢啲大粒佬有或者無機會做特首，而係話官媒做這些訪問動機不是如此。
高人話，去年佔中之後，特首CY話回歸經濟民生，中央對香港未來如何發展經濟特別關心，所以官媒做這些訪問，主要探討香港的前路，無欽點特首的意圖，大家諗多咗啦。
據了解，新華社做呢啲特輯的方向還不止問幾個高官，未來仲陸續有來，如果接受親新華社訪問就有機會特首， 將來大家還會見到唔少「候選人」喎。
Ariel
** 博客文章文責自負,不代表本公司立場 **
政府公布政治任命官員利益申報資料，好多人都想八吓新任民政事務局局長劉江華以及公務員事務局局長張雲正有乜身家，怎料兩位新貴竟然公布並無在香港和外地擁有物業，令人大跌眼鏡。兩人亦無特別董事職位，皆為馬會會員，亦正常過正常。
政壇八卦友有啲唔服氣，兩個局長都無樓？連海外樓都無？有公務員就話，張雲正一直係政府官， 劉江華太太穆斐文係廉署前社區關係處處長，公務員家庭唔買樓亦都唔奇。而劉江華過去長期競選，買樓投資隨時被批為炒樓，所以唔想投資買樓亦可能有選舉考慮。
講到局長議員樓王，就非行會成員李國章莫屬，亞瑟王出身世家，屋企有米，在香港同倫敦持有32個物業和8個車位，繼續蟬聯樓王。另一行會成員、經民聯林健鋒亦唔弱，有13個物業同15個車位，仲有1幢12層工廈，還在內地有6幅地。 新任行會成員、行政長官創新及科技顧問楊偉雄也屬多樓之人， 同太太在香港同海外合共持有10個物業。
在樓價飛漲的今天，無樓局長和多樓行政會議成員，真係屬於兩個唔同階級啦。
