松哥唔好再搞教育

「6.18」政改方案否決後，下屆特首沿用番選委會，跑馬仔就開始熱鬧啦。由黑馬姿態開始起跑的前財政司司長梁錦松，似乎愈來愈高調，由之前話唔會選，剛剛接受訪問就話，參選問題「 交給上帝」。

睇嚟松哥擺明有心再戰江湖選特首，在訪問中佢對時事亦都有唔少睇法，例如講到港大學生會衝擊校委會，佢認為年輕人有良好願望，但可惜爭取手段「錯晒」，同時又話對「等埋首副」 理由感到莫名其妙。一句講晒，各打五十大板，所有人都想討好。

曾擔任教統會主席的松哥又透露，當年與戴希立、 程介明積極推動教改，被傳媒稱為「三頭馬車」。事隔十五年，如今三人再碰頭，連同十幾個老朋友，正就教育問題進行研究。據聞研究報告有望明年初推出，他們更不諱言，不排除讓有興趣參選特首的人借來參考。

但Ariel同政圈中人以至平民家長傾起， 佢地一聽到松哥想再搞教育，就嚇到彈起，話松哥搞乜都好，求求佢千祈唔用再掂教育。佢任教統會主席期間，政府推動的連串教育改革，取消中史為必修科、搞出通識教育、 改革新高考，容許大批直資學校產生，搞到家長和學生一頭煙， 教師怨聲載道，教育界同埋「受教育界」提起都心驚驚， 成為好心辦壞事的典範。 到今天愈來愈多家長要花鉅資送仔女出國讀書，即使成績好的仔女也如是，就是怕他們在新高考過不了中文3級和通識2級這兩關。

高人聽完民意就認為，松哥既然係金融界才俊， 都係發揮自己所長好啲，唔好再搞教育政策啦。

Ariel

** 博客文章文責自負,不代表本公司立場 **

港澳辦副主任馮巍南來香港，與民主黨領導層食飯會面。民主黨主席劉慧卿今日話，理解各方對會面有不同意見，但重申會面對雙方都重要。

卿姐十分識做，正面評價會面。Ariel亦覺得任何時候溝通都是好的，都應該支持，有助政治氣氛和諧啲，但在實質問題上，要拉近泛民和中央的分歧，真是談何容易。

在政改方案否決後，民主黨開集思會，會後何俊仁話，不應因為政改否決而放棄和中央對溝通。 所以民主黨想溝通的姿態無變，在政改之前不見面，只不過明知中央想遊說他們轉軚支持政改方案，廢事俾人鬧，所以就唔見面。政改後就唔同。

不過見完面後，無論民主黨或者建制派，只要有選區議會的，都好怕呢件事會影響選情。 有些民主黨乳鴿平時都玩開激少少的反政府風格，如今阿頭突然同阿爺飲茶，就好怕選舉中會被人狙擊。

妙就妙在建制派議員同樣有另一些擔心，佢地在地區主要同民主黨打生打死，而家阿爺突然派港澳辦副主任一個咁高級的官員落到嚟香港，和對方飲啖茶食個包，好似好老友咁，選民就會問佢地， 你地咁砌人代唔代表中央架？

無論民主黨抑或建制派的地區人士，都問點解要而家見？有無諗過對選舉有副作用？ 呢啲咁深的問題，Ariel就唔係幾識答。 你睇民主黨有參選加區選的阿哥阿姐如涂謹申和黃碧雲都唔出席見馮 巍，就知佢地大玩今天今天星閃閃，閃得就閃啦。

另外令人關注的是特區政府和民主黨，又會唔會改善關係呢？