政事
林建岳岳少瓣數多多，除了搞經民聯之外，早前開咗檔香港文化促進聯合會，而家有最新消息，原來佢又搞緊智庫。
岳少早前搵咗前《信報》陳景祥過檔旗下，做香港文聯的行政總裁。在香港人眼中，對「文聯」呢個名稱無乜感覺，但在內地人心目中，「文聯」係好有代表性的組織，所以岳少搞香港文聯，似乎係面向內地多過面向香港。
岳少網羅傳媒精英真係一啲都唔手軟，最近又搵埋前《文匯報》總編輯李曉惠加盟，9月1日返咗工。李曉惠在《文匯報》做老總時，已經係岳少老友，所以時不時見到岳少的文章在《文匯》出現，例如政改投票翌日，《文匯報》在A3版頂位就出咗岳少的大作。李曉惠離職，岳少馬上拉攏加盟。有傳媒人笑言，岳少手下傳媒猛將之多，可以開兩份報紙。
原來李曉惠幫岳少搞緊一個智庫，最遲年底面世，搞得掂早啲出世。唔知點解，一講智庫，人人都聯系到特首選舉去造王，可能因為立法會主席曾鈺成又話搞智庫啩。
諗落又係，有個智庫，首先可以推自己屬意的人做特首，即使未必推到自己首選人馬出線，其他人去跑，都要拜一拜自己個山頭，爭取自己支持，到時就有數講啦。
Ariel
** 博客文章文責自負,不代表本公司立場 **
又有團體周日發起「光復上水」等行動，自由黨的批發及零售界立法會議員方剛批評，行動過於政治化。
政壇高人話，所有政治活動都政治化，那些示威團體有政治動機唔奇，自由黨評論呢的事件，將矛盾集中在特首CY，叫CY向內地人道歉，一樣有政治動機。
高人話，自由行放慢，而家呢啲代表商界利益的政黨係咁叫特區政府要求中央放更多自由行 旅客來港，呢啲要求中央不會同意，香港社會自己都承受唔起，而家叫做稍稍少啲大陸遊客，若然又多放自由行又增加番人數，做完之後，特區政和中央政府又會俾香港市民鬧，到時唔會見呢啲政黨出來挺吓政府。
佢話生意賺唔到錢要求變，一係搵多啲生意，一係就減少成本， 而做旅遊零售業的最大成本就是舖租， 唔知點解唔見呢啲政黨叫大業主減多啲租，支持吓零售業?
個別業主開始面對現實平啲租舖位出街。英皇珠寶鐘錶承租的銅鑼灣羅素街羅素街59號地下B1至B3號單 邊舖位，由英皇珠寶鐘錶租用12年，本來月租250萬， 業主一度想加到月租350萬，英皇唔願租宣佈退租。業主可能搵唔到新租客，近日剛剛大劈價以月租70萬元，以半年短租形式，續租俾英皇，租金較之前大跌7成以上，為租金跌幅最大舖位。大家唔好忘記，2003年呢個舖只係43萬 月租，加到上個租約的250萬，變咗近6倍，而家跌番少少都合理。
高人話，香港舖租太貴，不止中小企難做生意， 近日連鎖大企業都頂唔順，舖租唔跌，香港經濟無運行。
