區議會選舉下月22日舉行，有唔少政壇老將，都俾舊部下挑機，好以新民黨副主席田北辰在荃灣愉景選區，就面對以前的政治助理趙恩來的挑戰。
4年前趙恩來根本就係幫田二少選舉，後來趙恩來離開田二少，變身工黨成員，今次仲殺番入愉景區與前老細對打。田二少就以「只做實事，唔玩政治」為口號，好似質疑緊舊部下個工黨只懂拉橫額及喊口號。
田二少面對的挑戰仲唔算大，民協馮檢基仲大鑊。打算競逐連任深水埗麗閣區議員的基哥，腹背受敵，既受工聯會「小花」陳穎欣的挑戰，又要面對前黨友兼徒弟黃仲棋入場角逐。
黃仲棋曾在麗閣擔任10年區議員，在10多年前離開，如今再踩入麗閣區。馮檢基話，黃仲棋有向他傳短訊勸退，但他沒有回覆，「黃仲棋一直都叫我走轉區，我覺得這不是協商的做法。」基哥直指黃仲棋今次重返麗閣參選，只會搶走他的選票。
但黃仲棋就話自己在麗閣服務了10年，比馮檢基及陳穎欣都要長，而馮檢基身為立法會的超級區議員，可選擇的選區比他更多，「佢石硤尾、大坑東，整個深水埗都選過，故應該是馮檢基轉區。」
基哥在麗閣區絕不穩陣，2007年民建聯派個後生仔日日落區，只是落雨叫人關窗，關心吓市民，結果竟然差85票可以當選，當時已令基哥滴晒汗。如今工聯會派美女殺手出場，而黃仲棋又會搶走一部份泛民票，基哥若唔轉區，輸面好大。所以當舊部變成仇人，知道晒你拉票的手段，落區搶你票，都幾得人驚架。
Ariel
** 博客文章文責自負,不代表本公司立場 **
