當北極熊發現咗條褲

北極熊發起威嚟相當兇殘，其他時候都係好傻好天真，對萬事萬物都有份好奇心，咩都玩得一餐。睇吓呢隻北極熊發現咗條褲之後會做出咩搞笑行為！

攝影師話呢隻雌性北極熊喺冰原上發現一條雪到硬崩崩嘅長褲，兩隻手拎住左揈右揈玩咗好耐，曾試過用雙腳撐開，似乎想穿上，認真醒目！無奈佢Pat Pat實在太大，着唔到唯有放棄。北極熊搞笑舉動仲吸引咗佢同伴過嚟，一齊研究研究。

不過咁，條褲好明顯係人類留低嘅垃圾，大家去探北極熊時應該要為佢哋着想吓。佢傻更更食咗落肚咁點算呢！

萌萌動物星球

** 博客文章文責自負,不代表本公司立場 **

食嘢攝牙罅感覺難受，我哋可以拎支牙籤解決煩惱。動物牙縫攝咗嘢，無牙籤又無手又點呢？好彩唔使死頂，大自然有妙法，派出紅嘴牛椋鳥飛做牙醫。

36歲俄羅斯攝影師Yulia Sundukova日前喺坦桑尼亞恩戈羅恩戈羅保護區影到奇趣一幕，見到一隻牛椋鳥飛到長頸鹿嘴巴前邊起勢啄佢牙縫中嘅殘餘食物。長頸鹿可能正好為牙罅中嘅殘渣覺得煩惱，見有雀仔肯幫手表現相當配合，張口俾佢進行全面檢查。嗯，舒服晒。