臭臭公廁變靚靚住所

香港居住成本超高，上樓難過登天，政府話搵地發展同起樓有難度；有傳媒就話市區其實有好多廢墟同閒置地，只係改劃土地用途困難重重。政策嘅嘢我唔太理解，唔知如何可以「復興」廢地，但係成功的話結果可能令人相當驚喜。同大家睇個例子，英國婦人Laura Clark購入倫敦一個廢棄公廁，改建成美倫美奐嘅住所。

公廁位於倫敦市中心，1929年建成，到上世紀80年代開始暫停使用。Laura 2005年讀完書搬到倫敦加入一間建築公司，發現咗呢個地方，想改建成地下酒吧或者電影院。經過多次交涉，政府堅決拒絕佢將廁所變成商業用途。

既然商業用途唔得，Laura打算將公廁改建成住宅，自己住！由2008年開始，佢喺多個政府部門之間奔走，收集關於呢個公廁嘅一切資料，說明廁所已經失去公共設施功能。到2011年，佢終於成功說服政府，隨即買咗個廁所着手改建。

由於廁所內部環境實在太差，垃圾多，臭味濃，中人欲嘔，無人願意幫佢改建。佢唯有自己一手一腳慢慢嚟，由拆除廁格、修理天窗開始，再買入各種材料慢慢砌，花上年幾時間終於打造成一間住所，有睡房、廚房、客廳，所有設施一應俱全。最後成品如下，睇嘢啦。

奇趣錄

** 博客文章文責自負,不代表本公司立場 **

一個外國網站邀請資深名廚教網民混和三種芝士變成一種薄餅配料。片段不足一分鐘，網民爭相收看，睇完人人笑爆嘴！

片中名廚Michael Neylan有25年入廚經驗，名下有間專門負責私人飛機餐點以及私人廚師服務嘅公司，客戶多為政商名流，包括美國知名專欄作家兼富商瑪莎史都華（Martha Stewart）。見佢難得現身網上節目過兩招，一班識貨網民當然爭相收看。

片段一開始見到佢話今日要教大家混和三種芝士成為一種薄餅配料，然後煞有介事咁介紹材料，亦即係三種已經切好絲嘅芝士。之後佢將所有芝士倒入一個大碗中，以雙手攪拌，好的搞掂：「然後你可以用嚟製作你最愛嘅薄餅啦！」

片段至此結束。一班網民本以為呢位名廚會傳授啲咩特別技巧，最後先知不含一點技術成分。不過咪以為佢嘅「教學」僅此而已，仲有另外兩段示範影片，內容同樣無聊。

如何將麵糰放進雪櫃：

如何用鉸剪切開薄餅：