博客文章
「放下愁緒，今宵請你多珍重～」仲以為電視告白不停loop，原來係豬視妹發緊夢都仲唱住。
自從豬視妹知道TVB《金宵大廈2》將緊接《飛虎3壯志英雄》個檔期播出之後，佢話晚晚都夢見金宵大廈，以為自己返咗去陳山聰同李施嬅嘅平行時空。話晒《金宵大廈》播完都兩年有多，結局係點，記憶已經好模糊。可能因為咁，佢先會撈亂夢境同現實。
《金宵大廈2》由原班人馬拍攝，由10個單元故事貫穿，除咗有陳山聰、李施嬅、張彥博同趙希洛，今次仲加入咗山聰嘅契家姐伍詠薇、胡鴻鈞同蘇皓兒。
日前流出嘅預告片，就見到伍姑娘激動咆哮，十分搶戲。而首個單元係講由鄭子誠、于洋同曾展望三爺孫嘅異度空間講起，阿爺已經死鬼咗，無得見孫仔，但孫仔竟然見到阿爺識行識走，鬼咁靈異。
套劇4月4號先播，喺等候期間，可唔可以珍重今宵，畀我瞓番個好覺先呢，豬視妹？
霸戲哥
** 博客文章文責自負,不代表本公司立場 **
喺電影世界入面，我哋見到嘅母親角色，通常都被塑造成堅強勇敢，對兒女付出無私無限嘅愛。
但你我都知，呢個只不過係主流觀眾或俗世一廂情願對「母親」嘅刻板詮釋，而唔係事實。真相係，母親可以疏忽照顧子女，可以對丈夫不忠，可以拍拍籮友拋棄成頭家。
Maggie Gyllenhaal執導嘅《The Lost Daughter》（失去的女兒）就係一齣咁另類嘅電影。故事講述大學教授Leda（Olivia Colman）去希臘海邊渡假，喺沙灘遇到一對母女，勾起佢廿年前不堪回首嘅記憶。隨住劇情一層一層咁揭示Leda嘅過去，觀眾得悉原來當年佢為咗完成學業同不堪壓力，不惜賴低兩個女，就算之後返回兩女兒邊，都冇辦法彌補呢個傷痕，同忘記呢份罪疚感。
或者有觀眾會覺得套戲跳tone，唔明白Leda嘅情緒變化因由，但呢個其實正正喺年輕母親嘅複雜情緒，既要兼顧學業，又要撐起頭家，真係做人阿媽甚艱難。《The Lost Daughter》喪失嘅唔係個女，而係阿媽嘅自由、光陰同人生。套戲講中好多母親無法說出口嘅真實心聲。
Olivia Colman同Jessie Buckley分別扮演唔同年代嘅Leda，前者不嬲神級演技無可挑剔，後者居然有驚喜，尤其處理年輕媽媽對住女兒嗰種束手無策，同喺家庭、現實作出抉擇，嗰種複雜情感演繹得淋漓盡致。霸戲哥認為今屆奧斯卡最佳女配角非佢莫屬。
《The Lost Daughter》喺Netflix有得睇。
