博客文章
霸戲哥個大學死黨室友B，6月就要移民英國了，最唔捨得係冇得打天九。記得大學嗰陣，我哋日日走堂，唔喺球場練波，就係屈喺hall度打九，就算第日考試都要打番幾口莊，諗起都荒唐。
室友B係Engine仔，寫program難唔到佢，有日佢提議寫個天九program「天地在線」，等第時天各一方，都可以用Zoom嚟打九，諗落又好似work喎。
估唔到TVB一樣諗到呢條橋。今晚喺翡翠台播出嘅《總有歌聲喺隔離》，主持蕭正楠、區永權同埋伍仲衡，會聯絡身在外地嘅歌星，搞個線上音樂會，用歌聲嚟reconnect，幾有gimmick吖。
唔知有冇得點唱呢？我想聽歌神許冠傑嘅《宇宙無限》呢。
霸戲哥
** 博客文章文責自負,不代表本公司立場 **
豬視妹一直話要睇《月老》，可惜霸戲哥舊年聖誕忙到七彩，到過完年戲院又話要關門，搞到豬視妹好唔高興。女人最鍾意睇埋晒呢類婆媽戲。
估唔到機會又返番嚟，《月老》啱啱喺Disney+上架，呢日姑且陪豬視妹坐咗陣，一路寫稿一路睇。套戲故事簡單講，就係柯震東意外畀雷劈死，要投胎轉世就要做月老積陰德，於是同王淨part住做賺karma，結果喺凡間遇到佢隻狗狗同愛人宋芸樺，前世記憶返晒嚟。好典型嘅九把刀式愛情故事。
九把刀有樣好獨特，就係處理任何愛情故仔，都可以好中二病。男主角永遠都係咁天真單純，為愛人一往情深，唔搵柯震東做真係冇人適合。成套戲我只係戥王淨唔抵，默默為愛人付出又不求回報，此女只應天上有。當然隻小狗為套戲加唔少份數，睇完我都忍唔住錫咗啖我家衰狗大爺雞。
比起《那些年，我們一起追的女孩》，《月老》故事性比較弱，或者九把刀太貪心想將好多元素硬塞入去，結果進退失據。不過電腦特技真係唔錯，同埋王淨係靚嘅，如果佢同宋芸樺角色互換，我估我會投入好多。
睇完套戲，好想念西門町呀，幾時可以去？
