霸戲哥之日常#087 │ 執屋

豬視妹一諗到就快要搬屋，個心就好唔自在。家中雜物堆積如山，平日儲埋太多「雞肋」，正是取之無用、棄之可惜。斷捨離唔能夠apply喺豬視妹身上，但又無損佢追求空間感嘅衝動，搞到霸戲哥好頭痕。

Netflix 最近有套真人 Show 《執屋專家》第二季上架，同上一季一樣，兩位收納達人Clea同Joanna繼續為唔同人士提供收納服務，務求令屋企煥然一新。佢哋會介紹一啲實際嘅執屋技巧，除咗斷捨離之外，仲會教大家點樣有效率同系統咁organise佢哋嘅物件，包括顏色分類、視覺分類等等，唔係求其去IKEA買幾個收納箱就算。究竟work唔work，遲啲霸戲哥會同大家分享。

唔知《執屋專家》下一季有冇興趣向高難度挑戰呢？有的話可以嚟香港試下，呢度有劏房同曱甴屋，應該好睇過去啲明星大宅。

霸戲哥

** 博客文章文責自負,不代表本公司立場 **

霸戲哥個大學死黨室友B，6月就要移民英國了，最唔捨得係冇得打天九。記得大學嗰陣，我哋日日走堂，唔喺球場練波，就係屈喺hall度打九，就算第日考試都要打番幾口莊，諗起都荒唐。

室友B係Engine仔，寫program難唔到佢，有日佢提議寫個天九program「天地在線」，等第時天各一方，都可以用Zoom嚟打九，諗落又好似work喎。

估唔到TVB一樣諗到呢條橋。今晚喺翡翠台播出嘅《總有歌聲喺隔離》，主持蕭正楠、區永權同埋伍仲衡，會聯絡身在外地嘅歌星，搞個線上音樂會，用歌聲嚟reconnect，幾有gimmick吖。

唔知有冇得點唱呢？我想聽歌神許冠傑嘅《宇宙無限》呢。