翠如BB股聯旺集團(8217)搞到滿城風雨，我寫了兩次之後，都有好多網友留言問我問題，原來我發覺好多人都係唔明這些炒股如何運作。
其中一個問題係問，見到聯旺星期四收市還有8.6元，好多散戶都手痕痕，話如果上星期在低位5元買了，現在都很「和味」，升了72%。問我為何整天叫人不要買。
我覺得翠如BB股吸引了很多過去沒炒過股的散戶落場，他們根本不知道，眼見到的股價並不真實，聯旺搞上搞落，星期四市值還有112.2億。它的發行股數是12.48億股，理論上有百分之25的股份在街外流通，即是有3.2億股在街外流通，但它是配售上市，這3.2億股配發給百多個投資者拿著。
不過，你看看其上市這麼多天的成交，上星期三、四最高那兩天，成交股數都不夠4000萬股，好多的日子，成交股數都不夠1000萬。
即係話，這3億幾的街貨，只有極少數流了出街流通，以它112億市值來計，如果街外25%股份，現價沽晒出街，貨值28億。但是，你見最高成交那天的成交股數都是4000萬，還要注意這些股份可能係左手交右手，不是真係流入散戶手中，可能真的在散戶的貨好少。這樣說明了只係用好少的錢都可以承托住股價。
假設真正的街貨只有1000萬股，貨值只是8,990萬，即使持貨者同時全數沽出，用8千多萬都可以將它接晒，即是只要用少量的錢，可以維持住112億的市值。所以，唔好覺得隻股真係值112億。
我看了有周刊的標題：「老豆1萬變100億神話，王翠如內疚益了炒家」，亦都覺得相當好笑，她老爸的身家並沒有由1萬變100億，這些所謂100億只是帳面的財富，至於翠如BB講到內疚益了炒家，講到好似成件事不關她爸爸事，我就不知道對不對了。
在這些炒股遊戲中，她父親是主要股東，持這麼多貨，一沽貨出街股價即散，如今她爸爸無沽，都好配合市場的炒作，是否可以置身事外，令人懷疑。
成件事簡單總結，街貨的數量好少，所以可以炒到這麼高，到有一天大量的街貨散到出街給散戶接晒的時候，就無人會頂住股價，到時買家可以在幾秒間消失，你想沽都不會沽得到。
陸羽仁
** 博客文章文責自負,不代表本公司立場 **
黃翠如爸爸黃永華控股的聯旺集團(08217)，周二上市後喪升 3日，市值一度衝高至177.2億元。到周五聯旺股價急回， 結果跌25.9%收市，仍然有107.3億市值，相比翠如BB打工那間TVB(511)的124.2市值，唔差太遠。
傳媒娛樂版又急急計數，話翠如BB爸爸持有的37.5%股權計， 財富一日內蒸發14億元，持股現價得番40.2億元，翠如BB要 傷心過周末咁話。
呢啲講法，將股份帳面財富當真，睇落相當好笑。 股票要真實成交咗，有真金白銀過手交易，才反映真正價值。 聯旺周五只成交了1640萬元而矣， 還未計當中有多少係自己友左手過右手的交易都無人知。
我想提提大家，呢啲創業板喪炒股，殺人有兩波。第一波， 上市之初高位追入。聯旺是全配股上市，意思係無公開招股， 散戶買唔到。只有至少100個大戶投資人接了那25%股權， 這些人理論上是各自獨立股東，真相如何，你懂的。(若然不懂， 唔好買股票)
既然聯旺上市前貨源全由大戶持有，散戶要有貨，就在上市後才買。 散戶有個習慣，唔升唔撲入去，聯旺周二上市已大幅抽高， 報章娛樂版在周三一吹，人人都注意，當天就抽上14.2元的高位。翠如BB話有300幾個whatsapp發俾佢問股票， 相信不少在周三、周四高位搶入，呢兩日隻股13、14元浮游， 相信唔少娛樂版讀者係「資淺投資者」，在這些位置落叠。以14元 入貨價計，周五收8.6元，已唔見咗38.5%，扮咗蟹。 聯旺在高位一手(起碼入股數量)值14萬，如今帳面已唔見咗5. 4萬，隨時係打工仔3、4個月人工。所以睇娛樂版都可以致命。
聯旺周五上午曾暴跌及V彈。
呢啲創業板股份，第二波殺人局在下跌反彈時。財經版讀者是「 資深投資者」(當然資深散戶唔代表唔會輸)， 佢地會笑其他老散在高位搶入， 因為好多創業板股頭幾日升完就會急插， 所以資深散戶只會在大跌時撈底，博佢反彈， 希望食一兩成即日就走。
嘿嘿，你估幕後莊家唔知散戶習慣? 所以對「資深投資者」而言，殺局是在反彈時。 聯旺周五早上最勁曾跌6.6元，跌到5元，單日跌幅56.9%， 但好快在半個鐘內一個V字彈番上去，聯旺收市時返回8.6元， 只跌25.9%，其實已經收復大量失地。散戶睇住幅圖會諗:「 真老襯，如果我夠膽在5元撈貨，唔使半個鐘等反彈到8.6元即走 ，我馬上賺72%!」試得幾次咁樣反彈，佢一跌就好多人去撈， 佢地唔知，呢次可以反彈咁多，只因少人跟。到好多人跟時， 一跌大戶就派咗10幾億貨出街時，隻股就唔會再彈架啦。
陸羽仁見過太多呢啲殺人局，唔想大家再輸錢。呢啲喪升股， 幕後人唔係開善堂派錢俾人，你好難賺錢走。都係睇吓好啦， 唔好落場玩呀。
