今天中午和一個專業的靚太食飯，她和先生都是高職厚薪人士，講起未來退休生活時，佢提到一個「唔夠可以靠阿仔」的意見，我叫佢千祈唔好咁諗。靚太有兩位公子，全部是高材生，預計未來都可找到好工作，按我見他們兒時的印象，都是聰明聽話的乖孩子，但我仍然勸靚太不要有靠個仔的思想(雖然我估她其實無此需要)。
我上期寫到送仔女出國讀書是極昻貴的「消費」。有不少人不同意我的看法，除了覺得我太市儈，對仔女教育不應以金錢衡量之外，亦有不少人有「養兒防老」的心態，覺得送仔女出國讀書，將來他們讀好書搵到好工，會回報於父母。真的嗎?
我知道的一個個案，就是反面例子。父母是政府的初級職員，兒子中一的時候就送他去英國讀書，不知父母是因為公務員子女去英國讀書有津貼，還是覺得英國教育好好多(其實我都覺得英國教育比香港好一點，但付50萬一年去讀是否負擔得來，就要看自己的情況)，總之那時兒子根本不想出國，是父母逼他去。
但父母收入有限，供得兩三年父母已耗盡積蓄，唯有將自住樓拿去銀行盡量加按，再拿200萬出來支持兒子讀書。後來兒子讀到中七，英國高考成績不俗，同時報英國大學和香港大學，結果港大收了他讀商科，但英國也有大學收他，父母唔係太頂得順英國高昻的學費，想兒子讀港大，但兒子卻想在英國讀書，理由只是「我啲friends全部在英國讀大學喎!」為此父母暗中流淚，但兒子一意孤行，父母要借突供兒子在英國完成學業(今年畢業)，我恐怕兒子將來會留在英國做事，根本不會返香港。這對父母想要兒子回報他們，起碼幫手供按揭，但兒子是鬼佬思維，no way!
我認為這個慘局全是父母造成，當日兒子年紀少自己不願出國，為什麼要逼他去? 逼了他去他在那裡生了根，又怎能逼他回來唸大學? 兒子知不知道父母按樓按到突去供他讀書? 就我所知，父母一句沒有提，只說「總唔知想你返來讀大學」，他又怎會回來?
講番靚太那一筆，我話女兒顧家機會大少少，男孩多數不顧家。那麼他兩個兒子將來娶了老婆，老婆一句不同意他去養老豆老母，你話個仔聽邊個話。
我的媽媽對我影響很大。我自細她就對我講:「你唔讀書聽乞米」、「你大個唔好旨意我俾錢你買樓你要靠自己」、「我老咗唔使你養我，你搞掂自己就得啦」。我長大後才知道，她想培養我自立自強的性格，叫我長大後不要靠屋企，她也不會靠我。我想所有父母也應如此，否則仔女不會有獨立的搵食能力喎。
巴士的退休資金計算機：
http://bastillepost.com/hongkong/Calculator
陸羽仁
** 博客文章文責自負,不代表本公司立場 **
我地整咗個「巴士的退休資金計算機」(http://goo.gl/YUpxhk)出來之後，好多人俾咗意見。
靚太話「你呢個乜嘢計數機嚟架，我有8個位的儲蓄，輸入咗資料，竟然話我仲差300萬先可以退休，你有無搞錯?」我反問靚太的輸入咗幾時退休? 靚太話「兩年後囉。」
我答謂:「你靚太是高薪人士，部機預設咗你退休後至百年歸老之時，都有現在每月收入50%可用，但由於是計現時幣值，去到你80、90歲，受通脹影響，呢啲錢的購買力只等如你而家人工的20、30%，一啲都唔多。咁你兩年後咁早就想退休，又要大體上維持接近而家的生活水平，即係仲要預你使多38年，你按吓計算機都知要幾多錢，唔夠有幾出奇。」(靚太堅持生活水平可以調低，建議我地比網友自己選未來消費水平咁話)
雖然有呢個計算機俾大家玩玩吓好得意，但真正的意義在於：在人類壽命愈來愈長時，你唔早啲為退休打算，你老來都幾悲，將來完全唔可以維持而家的生活水平，衰起上來真係去到一個執紙皮的處境。
我好早已經發現，很多人是完全沒有退休後怎樣生活的計劃。我認識一對夫婦，只有50歲的先生打工，是一個本地企業的銷售經理，我估計他月薪大約5萬，本來都屬高收入一族，太太沒有做事，有兩女兒，大女早在三年前中四就去了英國留學，就快入大學，如今讀中四的二女見姐姐有得去，話學校逼得太緊，也想去英國讀書，今年秋季成行。
我問銷售經理，英國加晒學費，一年加生活要50萬，中五開始讀，加埋大學讀總共6年，一個唔見咗300萬。仲要去兩件，兩個唔見600萬喎！我話唔好怪我市儈，大女將入大學讀音樂，細女將來想讀文學，將來做嘢點pay back呀？ 你有無同佢地講出國讀書咁貴架，仲見佢地一年返來四五次喎? 佢話做人父母唔可以計咁多，那時大女讀名校，好多同學頂唔順就過咗英國，佢想去就俾佢去啦，無諗過細女又話要去，而家洗濕咗個頭無法啦。
我話我估你至多可以儲到40%收入，一年儲得24萬，以現時人工計，600萬等如你24年的淨儲蓄，你一生儲蓄俾埋佢都唔夠喎，你點頂兩個女去英國讀書？佢話自己早前買多咗間樓，賣咗執咗200萬俾個大女去外國讀書，細女去埋好快就唔夠，想加按層樓供細女讀書。我話，吓，咁大劑，你可能只做多十年咋喎，退休時仲欠一身債。佢一臉無奈。
我用個退休計算機計一計，假設佢60歲退休，退休時薪5.5萬元，儲蓄為零，佢退休時欠缺退休資金係810萬! 攞番100零萬退休金，賣埋自住樓都唔掂喎。
呢個銷售經理唔嫖唔賭，本來都係一個中高收入的好好先生，但愛女如命，唔識諗，無為未來打算，送女去外國讀書敗晒身家，老來點算？出國讀書都係高消費，唔該大家計吓數啦。
