炒貴股要有隨時抽身的準備

昨日港股都大跌超過600點，其中一個原因話係1987年股災30周年，人心脆弱。跌市周年作為大插的理由，雖然有啲古怪，無論如何大市升得多隨時會跌，呢個係恆古不變的定律，跌完可以無事再炒，亦都可以跌完深度插落去。

跌市時候就想起最近睇到「商品大王」之稱的羅傑斯提到他繼續睇好內地股市，會繼續持有，但同時擔心全球股災會隨時發生。對於環球股市，他睇好內地股，說自己揸了A股、B股、H股和在美國預託證券上市的中資股，會繼續持有。他睇好內地農業股、醫療健康股、教育股。又說與一帶一路相關的股份，最具潛力。

羅傑斯雖然對中國股市看高一線，但同時擔心全球股災即將發生，他最留意聯儲局一舉一動，怕出現問題，拖垮全球股市。他又提醒，負債過高的內地企業有機會破產，而過份受追捧的科技龍頭股如騰訊（700）和阿里巴巴，可能會受到股災拖累。

羅傑斯是一個資深投資家，他的說話值得參考。但在牛市當中，我們每日都會遇到股災即將發生的預言，但相信了這些預言而不去買股，大市可能在未來的三個月、半年、一年仍繼續上升。面對這些評論，我的策略是把買股分成兩部分：「投資的我」和「投機的我」。

「投資的我」會少沾手羅傑斯講有泡沫的東西，比特幣當然不掂啦，一些很貴的科技股，也很難買入。像騰訊，現價72倍歷史市盈率，點計都係比較貴。「投資的我」不買這些貴東西，面對的問題是買有價值的股份，回報可能追不上那些急速增長的股份。但賺少一些，不等於輸錢。投資需要穩陣，少賺一些無所謂。

如果覺得牛市會繼續，股市仍然可以炒，科技股還會繼續升，我就會以一個「投機的我」的心態來處理。在升市當中，「投機的我」的策略是逢有多一點的回吐時就會買入，走一段，也定好止蝕。以8月之後的騰訊而言，一個小浪調整通常連10%也沒有，例如在8月17日高位341元，調整到8月29日低位314元，只跌了8%。炒作的策略可能是等騰訊回吐7%以上就揸，搏它回升10%至20%就走。騰訊既然調整不超過8%，跌了7%買入，定跌10%止蝕，炒貴股要有隨時抽身的準備。

如果真的在買入後再跌到止蝕位要打靶，騰訊已經跌超過17%，已形成一個跌浪，都要走人。

炒作貴股份的基本態度，就是要定好止蝕。當然，如果一晚跌三成，自然走避不到。如果是慢慢跌下來的話，即使最後出災，只要嚴守止蝕，可以避得開，同時也不會錯過短期炒作機會。

陸羽仁

陸羽仁

** 博客文章文責自負,不代表本公司立場 **

唔知大家仲記唔記得有隻翠如bb股叫聯旺集團（08217），呢隻股在6月27 日的細價股閃崩潮中，股價一日重挫89.4%，之後就散咗。

我都忘記咗呢隻股，但係早兩日有個好日都唔見的朋友仔WhatsApp我，話聯旺一日反彈咗40%，問我點睇？

我打開聯旺的股價圖，發現佢有3毫幾升到4毫幾，心諗都佢已經跌到咁低，升少少又有幾巴閉？又可以點睇呢？

講起呢個朋友仔有段古，聯旺呢隻邪股去年上市之後係咁升，之後略回，去到10月一度回落到11元多的水平，呢個朋友仔就WhatsApp我，問我好唔好買? 我明知隻野係炒股，答呢啲問題真係兩難題，叫人唔買，亦估到隻股短期內好可能會繼續升，就阻人發達。同意佢買，呢啲邪股完全冇基本因素，炒到市值百幾億追得上TVB(0511) ，都係一個殺人局，唔係幾忍心見佢撲入去慘死，所以就提醒佢，炒呢啲炒股要小心。

聯旺一年圖

結果真係阻咗人發達，隻股跌少少就開始急彈，好快上返13元、14元，朋友仔後來就係呢啲水平高追咗。後來聯旺喪升到26 元，聞說朋友仔都無沽，仲起高位20多元再追，仲好開心咁話俾我聽，你話我可以點回應呢？呢個世界「阻人發達如殺人父母」，講多兩句畀人鬧，我盡咗做朋友嘅責任，提醒咗就算。

後來隻股在6月勁插，睇番可能係因為6月27日13隻跌幅超過50%的股票中，它們的投資者持倉名單上，好多都有貝格隆證券，所持的倉位大多位居前列，相信係因為同一個炒作系列的股票遭遇洗倉式拋售，同系股份又可能交叉持股，觸發相關公司股價暴挫，一死咗就好難救得番啦。

我估朋友仔都用咗10幾20萬元去買聯旺，如果平均價20元買，用咗20萬元，而家聯旺股價得番0.45元，即係得返4500元 ，反彈四成都係多緊千幾蚊，真係喊都無謂。

我唔係話唔可以炒作，但係做「投機的我」，一定要知道自己做乜，要好貼市，轉身好快，一唔掂就走。但好似隻聯旺咁一日跌九成，即是你定咗10%作為止蝕位，都走唔到，所以炒莊家股，就要預咗total loss之時。

呢個朋友仔如今好似「見咗棺材都唔識得流眼淚」，仲對着聯旺好有期望咁款，望佢翻身，我真係唔知點講好啦。教人發達唔易，教人唔輸身家，其實一樣咁難。